لاہور: ’چولستان کو پانی دینے کے لیے پنجاب کی کون سی نہر بند ہوگی؟‘ پیپلز پارٹی پنجاب کے رہنماؤں نے وزیراعلیٰ پنجاب مریم نواز سے سوال کیا ہے۔
پیپلز پارٹی کے رہنما چوہدری منظور نے پریس کانفرنس میں مریم نواز سے سوال کیا ہے انہوں نے کہا کہ انڈس ریور سسٹم اتھارٹی(ارسا) کے مطابق پہلے ہی پانی کی قلت ہے۔
پیپلز پارٹی کے رہنما چوہدری منظور نے پوچھا کہ چولستان کے لیے سرگودھا، فیصل آباد، قصور، اوکاڑہ یا رحیم یار خان سے کس ضلع کا پانی بند کیا جائے گا؟
پی پی رہنما کا کہنا تھا کہ کینالز کے ایشو پر وزیر اعظم سے میرا سوال ہے، حکومت نے ایک بھی مشترکہ مفادات کونسل کا اجلاس نہیں بلایا، صدر نےکینالز منصوبہ کی منظوری نہیں دی اور آبی ماہرین کہتے ہیں یہ منصوبہ نہ قابل عمل ہے۔
کینالز معاملہ: وزیراعظم اور وزیراعلیٰ سندھ کی ملاقات طے پاگئی
چوہدری منظور کا کہنا تھا کہ اس وقت سسٹم میں 43 فیصد پانی کی کمی ہے، دریائے ستلج میں پانی نہیں ہے جبکہ نہروں میں پہلے ہی پانی کی کمی ہے، ارسا ایکٹ میں لکھا ہے پانی کے مسئلے پر کوئی ایشو ہوگا تو سی سی آئی بلائی جائے گی۔
"ایک سال ہوگیا ابھی تک کوئی بھی سی سی آئی کی میٹنگ نہیں بلائی کیوں؟ آبی ماہرین کہہ رہے ہیں کہ نہر نکالنا ناممکن ہے، کہتے ہیں سیلاب کا پانی لیکر جائیں گے سیلاب 3 ماہ کا ہوگا بعد میں کیا کرینگے، یہ دنیا کی تاریخ کی پہلی نہر ہے جس میں ریورس انجینئرنگ ہورہی ہے”
دوسری جانب ندیم افضل چن نے کہا کہ چولستان سے محبت نہیں ان کی نیت خراب ہے، نہروں کا ڈراما رچایا، یہ ضیاالحق کے وارث تو ہوسکتے ہیں پنجاب کے نہیں۔
