کراچی: رہنما پاکستان پیپلز پارٹی شیری رحمان کا کہنا ہے کہ سیاسی لیڈرگرفتاری سے نہیں ڈرتا بلکہ بہادری سےمشکلات کاسامناکرتاہے۔
تفصیلات کے مطابق کراچی میں سینٹرل ایگزیکٹیو کمیٹی کے اجلاس کے بعد میڈیا سے گفتگو کرتے ہوئے شیری رحمان نے کہا کہ اجلاس میں فوجی تنصیبات پر حملے، جناح ہاؤس سمیت شہدا کے یادگاروں کو مسمار کرنے کی شدید الفاظ میں مذمت کی گئی۔
شیری رحمان نے کہا کہ نو مئی ملک کی تاریخ کاسیاہ دن تھا،ایسا منظر کبھی نہیں دیکھا،پیپلزپارٹی نے مشکل حالات میں بھی صبر کا مظاہرہ کیا،بے نظیر کی شہادت پر آصف زرداری نے پاکستان کھپے کا نعرہ لگایا۔
چیئرمین پی ٹی آئی کو تنقید کا نشانہ بناتے ہوئے شیری رحمان نے کہا کہ پی ٹی آئی نے پاکستان کےاستحکام پر وارکرنےکی باربارکوشش کی ہے،عمران خان پرشفقت نظر ہوتی ہے،ایک نیا عمرانی معاہدہ ہوگیا ہے،عمران خان کو خصوصی ریلیف دیاجاتاہے۔
انہوں نے الزام عائد کیا کہ فرد واحد کیلئے مشکلات حالات میں ‘پاکستان جلاؤ پاکستان بندکرو’ کیا گیا، پی ٹی آئی کےشرپسندوں نےجوکیا وہ دشمن بھی نہیں کرسکتا،عمران خان تو پہلےہدایت دے رہےتھے اب کہتے ہیں ہمیں پتہ نہیں۔
نیوزکانفرنس میں شیری رحمان نے کہا کہ پیپلزپارٹی کیلئے مشکل ہے کہ ہم ملک کیلئےقربانیاں دیں اوریہ انا پرچلیں،سیاسی لیڈرگرفتاری سےنہیں ڈرتا بلکہ بہادری سےمشکلات کاسامناکرتاہے۔
شیری رحمان سے پی ٹی آئی پر پابندی سے متعلق سوال کیا گیا تو انہوں نے کہا کہ اجلاس میں پی ٹی آئی پر پابندی سے متعلق کوئی بات نہیں ہوئی، ہمارا واضح موقف ہے کہ جنہوں نے قانون ہاتھ میں لیا ان کیخلاف کارروائی ہو۔
