اسلام آباد: پاکستان پیپلز پارٹی نے سردار لطیف کھوسہ کو شوکاز نوٹس جاری کر دیا ہے۔

تفصیلات کے مطابق سردار لطیف کھوسہ کو دوسری پارٹی کے سربراہ کے کیسز میں معاونت پر پارٹی کی جانب سے شوکاز نوٹس جاری ہو گیا ہے۔

نوٹس میں کہا گیا ہے کہ لطیف کھوسہ پیپلز پارٹی کی سینٹرل ایگزیکٹیو کمیٹی کے ممبر ہیں، اور وہ بغیر اطلاع دوسری جماعت کے سربراہ کے کیسز میں معاونت کر رہے ہیں۔

شوکاز نوٹس کے مطابق دوسری جماعت کے سربراہ نے کرپشن کیسز میں سزا پائی ہے، لیکن لطیف کھوسہ نے ان کیسز میں معاونت کی، اور وکلا کنونشن سے خطاب میں سائفر کو لے کر ریاست پر بھی تنقید کی۔

لطیف کھوسہ سے 7 روز میں شو کاز نوٹس کا جواب طلب کیا گیا ہے، جواب نہ دیے جانے پر ان کے خلاف ضابطے کی کارروائی عمل میں لائی جائے گی، اور پارٹی کی بنیادی رکنیت ختم کر دی جائے گی۔

شوکاز نوٹس پیپلز پارٹی کے سیکریٹری جنرل نیئر بخاری کی طرف سے جاری کیا گیا ہے۔