اسلام آباد ؛ پاکستان پیپلز پارٹی نے قومی اسمبلی میں پروفیسر سلمان حیدر سمیت سوشل میڈیا میں متحرک تین افراد کے لاپتہ ہونے پر توجہ دلاؤ نوٹس جمع کرادیا ہے۔
اس بات کا انکشاف پاکستان پیپلز پارٹی کے چیئرمین کی بہن بختاور بھٹو زرداری نے سماجی رابطے کی ویب سائیٹ ٹویٹر پر اپنے ایک پیغام میں کیا۔
#PPP calling attention on missing social media activists pic.twitter.com/lkQA4tuspM
— Bakhtawar B-Zardari (@BakhtawarBZ) January 9, 2017
انہوں نے کہا کہ سوشل میڈیا پر متحرک لوگوں کے لاپتہ ہونے پر تشویش ہے جس کے لیے قومی اسمبلی میں توجہ دلاؤ نوٹس جمع کرایا ہے تاکہ اس اہم معاملہ پر ایوان کی توجہ دلائی جا سکے اور وزارت داخلہ سے معلومات حاصل کی جا سکیں۔
توجہ دلاؤ نوٹس پیپلز پارٹی کے اراکین قومی اسمبلی نوید قمر، نفیسہ شاہ، عذرا افضل پیچوہو، شازیہ مری اور شاہدہ رحمان کی جانب سے جمع کرایا گیا ہے۔
واضح رہے گزشتہ ایک ہفتے کے دوران سوشل میڈیا پر متحرک سماجی و انسانی حقوق کارکن اور فاطمہ جناح یونیورسٹی کے پرفیسر سلمان حیدر سمیت تین افراد لاپتہ ہوگئے ہیں اور تاحال ان کی بازیابی عمل میں نہیں آسکی ہے۔
اطلاعات کے مطابق پروفیسر سلمان حیدر کے علاوہ لاپتہ ہونے والے دیگر دو افراد وقاص گورایہ اور عاصم سعید بھی سوشل میڈیا پر کافی متحرک تھے۔
