لاہور: پیپلزپارٹی کے سینئر ترین پارلیمنٹیرین سینیٹر تاج حیدر کا کہنا ہے کہ اگر پنجاب اور کے پی کے انتخابات میں تاخیر ہوئی تو پیپلزپارٹی مخالفت کرے گی۔
تفصیلات کے مطابق پیپلزپارٹی کے سینئر ترین پارلیمنٹیرین سینیٹرتاج حیدر نے اےآر وائی نیوز کو خصوصی انٹرویو دیتے ہوئے کہا کہ آئین کےمطابق انتخابات وقت سے ایک دن بھی آگےنہیں ہونے چاہئیں۔
تاج حیدر کا کہنا تھا کہ اگرپنجاب اورکےپی کےانتخابات میں تاخیر ہوئی توہم مخالفت کریں گے، پیپلزپارٹی انتخابات میں تاخیر کو جمہوریت کےلیےنقصان دہ سمجھتی ہے۔
پیپلزپارٹی کے سینئر رہنما نے کہا کہ جوخطرات ہیں وہ درست ہیں لیکن اس کا حل نکالنا چاہیے،مالی حالات خراب ہونے کے باوجود انتخابات کےلیےوسائل مختص کرنا ہوں گے۔
ان کا کہنا تھا کہ حالات کی خرابی کا حل یہ نہیں کہ انتخابات ہی نہ کرائے جائیں، فضول خرچی نہ کریں لیکن اخراجات جمہوریت کی راہ میں کھڑے نہیں ہونے چاہئیں۔
سینیٹرتاج حیدر نے مزید کہا کہ پیپلزپارٹی کا موقف واضح ہے ہم ہرالیکشن میں حصہ لیں گے۔
