اسلام آباد: وفاقی وزیر برائے مواصلات مراد سعید کا کہنا ہے کہ جتنے زیادہ چور پکڑے جاتے ہیں اتنی ہی زیادہ چیخیں ہوتی ہیں، سیاست کی آڑ میں چوری کی گئی دولت ہضم نہیں کرنے دیں گے۔
تفصیلات کے مطابق وفاقی وزیر مراد سعید کا کہنا ہے کہ پی پی نے جمہوریت کوعوام سے انتقام کا وسیلہ بنایا، حادثاتی چیئرمین نے بھی آج یہ ٹھیک کہا ہے، جمہوریت کو نہیں نقاب اوڑھے کرپٹ کرداروں کو خطرہ ہے۔
انہوں نے کہا کہ بھٹوکے فلسفے کو دفن کر کے دوسری نسل نے اقتدار میں قدم رکھا، تیسری نسل دوسری نسل کی لوٹ مار بچانے کے زور لگا رہی ہے، لٹیروں کے چنگل سے سندھ کی نجات نوشتہ دیوار ہے۔
مراد سعید نے کہا کہ سندھ کی نجات کی ابتدا لاڑکانہ سے ہوچکی ہے، آئندہ انتخاب میں سندھ میں نیا سورج طلوع ہوگا، پرچیوں سے لیڈر بننے والوں کے پاس کوئی آپشن نہیں ہے۔
وفاقی وزیر نے مزید کہا کہ جتنے زیادہ چور پکڑے جاتے ہیں اتنی ہی زیادہ چیخیں ہوتی ہیں، سیاست کی آڑ میں چوری کی گئی دولت ہضم نہیں کرنے دیں گے۔
