پاکستان پیپلزپارٹی(پی پی پی) نے سینیٹر یوسف رضاگیلانی کو چیئرمین سینیٹ بنانے کا فیصلہ کیا ہے۔
ذرائع کے مطابق پیپلز پارٹی نے یوسف رضا گیلانی کو چیئرمین سینیٹ بنانے کا فیصلہ کیا ہے، پی پی قیادت نے یوسف رضاگیلانی کو فیصلے سے آگاہ کر دیا ہے۔
پیپلزپارٹی ذرائع نے بتایا کہ یوسف رضاگیلانی صدارتی الیکشن میں بطور ایم این اے ووٹ دیں گے، اور پھر اپنی سیٹ چھوڑ دیں گے جس کے بعد ان کی نشست پر قاسم گیلانی الیکشن لڑیں گے۔
ذرائع نے بتایا کہ یوسف رضا گیلانی سینیٹ الیکشن میں حصہ لیں گے، وہ پیپلزپارٹی کے چیئرمین سینٹ کے امیدوار ہونگے، سینیٹ کیلئے وہ جلد کاغذاتِ نامزدگی جمع کرائیں گے۔
یار رہے کہ یوسف رضا گیلانی نے 29 فروری کو ملتان سے قومی اسمبلی کی نشست جیتنے کے بعد رکن قومی اسمبلی کا حلف اٹھایا تھا اور گزشتہ روز قومی اسمبلی میں وزیراعظم کے انتخاب کے دوران مسلم لیگ (ن) کے صدر شہباز شریف کو ووٹ دیا تھا۔
گزشتہ دنوں وفاق اور صوبوں میں حکومت سازی کیلئے پیپلزپارٹی اور مسلم لیگ (ن) کے درمیان طے شدہ پاور شیئرنگ فارمولے کے مطابق یوسف رضا گیلانی کو سینیٹ کا چیئرمین بنایا جائے گا۔
سینیٹ انتخابات میں یوسف رضا گیلانی کا مقابلہ سنی اتحاد کونسل (ایس آئی سی) کے چوہدری الیاس مہربان سے ہوگا، جس کے لیے 14 مارچ کو قومی اسمبلی میں پولنگ ہوگی۔
