اسلام آباد : کراچی طیارہ حادثے کی ابتدائی رپورٹ آج منظرعام پر لائی جائے گی، غلام سرور پریس کانفرنس میں رپورٹ اوراس کےمندرجات سے متعلق آگاہ کریں گے۔
تفصیلات کے مطابق کراچی طیارہ حادثے کی ابتدائی رپورٹ شام 4بجے منظرعام پر لائی جائے گی ، وفاقی وزیر غلام سرور پریس کانفرنس کے ذریعے طیارہ حادثے کی ابتدائی رپورٹ اوراس کے مندرجات پیش کریں گے۔
خیال رہے گزشتہ روزانھوں نے کہا تھا کہ ابتدائی رپورٹ بدھ کوایوان میں پیش کی جائے گی۔
یاد رہے 22 جون کو وزیرہوابازی غلام سرور خان نے ملاقات میں وزیراعظم عمران خان کوکراچی طیارہ حادثے کی تحقیقاتی رپورٹ پیش کی تھی اور طیارہ حادثےکی وجوہات سےمتعلق وزیراعظم کوآگاہ کیا تھا۔
مزید پڑھیں : وزیراعظم عمران خان کو کراچی طیارہ حادثے کی تحقیقاتی رپورٹ پیش
کراچی طیارہ حادثے کی ابتدائی تحقیقاتی رپورٹ میں کپتان اورائیرٹریفک کنٹرولر کو حادثے کا ذمہ دار قرار دیتے ہوئے کہا گیا تھا کہ کپتان نے پروسیجر پر عمل درآمد نہیں کیا تھا، کپتان ضرورت سے زیادہ پراعتماد تھا۔
ابتدائی تحقیقاتی رپورٹ میں کہا گیا تھا ایئرٹریفک کنٹرولر بھی واقعے کے ذمہ دارہیں ، جب انجن رن وے سےٹکرائے تھے تو اسی وقت طیارے کو روکنا چاہیے تھا، اپروچ ٹاور نے کنٹرول ٹاورکو سوئچ اوور نہیں دیاتھا اور فریکوینسی اپنے پاس رکھی تھی۔
بعد ازاں ایوی ایشن ڈویژن نے پی آئی اے طیارہ 8303 حادثے کی رپورٹ مسترد کردی تھی اور کہا تھا کہ ایوی ایشن ڈویژن نے طیارہ حادثے پر کوئی تحقیقاتی رپورٹ جاری نہیں، میڈیا چینلز کی جانب سے چلائی جانے والی رپورٹ درست نہیں۔
واضح رہے کہ 22 مئی جمعۃ الوداع کو لاہور سے کراچی آنے والا پی آئی اے کا طیارہ ایئرپورٹ کے قریب واقع ماڈل کالونی جناح گارڈن کی رہائشی آبادی پر گر کر تباہ ہوگیا تھا جس کے نتیجے میں 97 مسافر ہلاک جبکہ 2 مسافر معجزانہ طور پر بچ گئے تھے۔ حادثے میں مقامی لوگوں کی ہلاکتیں بھی ہوئیں جبکہ پانچ گھر مکمل تباہ ہوگئے تھے۔
