اسلام آباد : صدر مملکت عارف علوی نے وزیراعظم عمران خان کی سفارش پر اعظم سواتی کا بطور وفاقی وزیر سائنس اینڈ ٹیکنالوجی استعفیٰ منظور کرلیا ، اعظم سواتی نے 6دسمبر 2018 کو وفاقی وزیر کی حیثیت سےاستعفیٰ دیا تھا۔
تفصیلات کے مطابق اعظم سواتی کا بطور وفاقی وزیر سائنس اینڈ ٹیکنالوجی استعفیٰ منظور کرلیا گیا، کابینہ ڈویژن نےاستعفےکی منظوری کانوٹی فکیشن جاری کردیا ہے ، نوٹی فکیشن میں کہا گیا کہ صدر نے وزیراعظم کی سفارش پر استعفیٰ منظور کیا، استعفےکی منظوری کا اطلاق 6دسمبر 2018سے ہوگا۔
یاد رہے اعظم سواتی نے 6دسمبر 2018کو وفاقی وزیر کی حیثیت سےاستعفیٰ دیا تھا، استعفےکی منظوری کا نوٹی فکیشن ایک ماہ 3دن بعد جاری کیا۔
اعظم سواتی نے اپنا استعفیٰ وزیراعظم عمران خان کو پیش کرتے ہوئے استعفیٰ قبول کرنےکی درخواست کی تھی اور کہا تھا لپ ملک میں عدالتی نظام کی بالادستی کے لیے استعفیٰ دے رہا ہوں، جب تک آئی جی اسلام آباد تبادلہ کیس کا فیصلہ نہیں آجاتا حکومت کاحصہ نہیں رہوں گا۔
اعظم سواتی کا مزید کہنا تھا کہ موجودہ حالات میں وزارت کا قلمدان پاس نہیں رکھ سکتا، اخلاقیات کو ملحوظ خاطر رکھتے ہوئے مستعفی ہورہا ہوں، مستعفی ہونے کے بعد سپریم کورٹ میں مقدمے کا دفاع کروں گا۔
مزید پڑھیں : اعظم سواتی کا تحریری استعفیٰ سامنے آ گیا
بعد ازاں وزیراعظم عمران خان نے استعفیٰ ٰقبول کرلیا تھا۔
خیال رہے اعظم سواتی کیخلاف سپریم کورٹ میں آئی جی تبادلہ کیس زیرسماعت ہے، رواں ماہ 7 نومبر کو اعظم سواتی کے غریب خاندان سے جھگڑے کے معاملے پر سپریم کورٹ نے جے آئی ٹی کو تحقیقات کے لیے دس ٹی او آرز دیتے ہوئے دو ہفتے میں رپورٹ طلب کی تھی۔
جے آئی ٹی نے معاملے کی تحقیقات کے بعد مرتب کی جانے والی رپورٹ میں اعظم سواتی کو واقعے میں قصور وار قرار دیا تھا جبکہ سپریم کورٹ میں آئی جی تبادلہ کیس کی سماعت میں چیف جسٹس اعظم سواتی پر آرٹیکل 62ون ایف کا اطلاق کرنے کا عندیہ دے چکے ہیں۔
