اسلام آباد : صدر مملکت ڈاکٹر عارف علوی نے نگران وزیر قانون و انصاف احمد عرفان اسلم سے ملاقات میں الیکشن کی تاریخ دینے سے متعلق صدارتی اختیار کا ذکر کیا تو وزیرقانون نے کہا کہ انتخابات کی تاریخ دینا الیکشن کمیشن کا اختیار ہے۔
تفصیلات کے مطابق صدر مملکت ڈاکٹر عارف علوی سے نگران وزیرقانون و انصاف احمد عرفان اسلم کی ملاقات ہوئی ، جس میں انتخابات کی تاریخ پرغور کیا گیا۔
ذرائع نے بتایا کہ ملاقات میں صدر مملکت نے الیکشن کی تاریخ دینے سے متعلق صدارتی اختیا ر کا ذکر کیا تو وزیر قانون نے انتخابات کی تاریخ سے متعلق وزارت قانون کا موقف دہرایا۔
ذرائع کا کہنا تھا کہ وزیرقانون کی رائے تھی کہ انتخابات کی تاریخ دینا الیکشن کمیشن کا اختیار ہے۔
ذرائع نے مزید کہا کہ وزیرقانون نے الیکشن کی تاریخ دینے سے متعلق الیکشن ایکٹ میں ترمیم کا بھی حوالہ دیا اور کہا صدر مملکت نے تاریخ دی تو الیکشن کمیشن مسترد کر سکتا ہے۔
