اسلام آباد: صدر مملکت ڈاکٹر عارف علوی اور وزیراعظم عمران خان نے رمضان المبارک کے آغاز پر قوم کو مبارکباد دی ہے۔
تفصیلات کے مطابق رمضان المبارک کی آمد پر صدر پاکستان ڈاکٹرعارف علوی نے اپنے پیغام میں کہا کہ اس مقدس ماہ میں قومی ترقی، امن اور خوشحالی کی راہ میں حائل تمام رکاوٹیں دور کرنے کا عہد کرنا چاہیے۔
دوسری جانب وزیراعظم عمران خان نے رمضان المبارک کے آغاز پر اپنے پیغام میں کہا کہ حکومت عوام کو کھانے پینے کی اشیاء مناسب قیمتوں پر بلا تعطل فراہمی کے لیے رمضان پیکج کا پہلے ہی اعلان کرچکی ہے۔
وزیراعظم پاکستان نے کہا کہ سحر اور افطار کے دوران بجلی، گیس اور پانی کی فراہمی یقینی بنانا حکومت کی اولین ترجیح ہے۔
ماہ رمضان آتے ہی مساجد کی رونقوں میں اضافہ
رحمت، مغفرت اور جہنم سے نجات کے بابرکت مہینے رمضان المبارک کا آغاز ہوگیا ہے، یہ مبارک مہینہ شروع ہوتے ہی مسجدوں کی رونق بڑھ گئی، ایمانی حرارت سے مامور اللہ کے بندوں نے اپنے پروردگار کی رضا کے لیے فرائض کی ادائیگی کے ساتھ ساتھ خصوصی عبادات شروع کردیں۔
ملک کی تمام چھوٹی بڑی مساجد میں نماز تراویح کا خصوصی اہتمام کیا گیا، جہاں ہزاروں فررزندانِ توحید اپنے خالق حقیقی کے آگے سجدہ ریز ہوئے۔ کراچی میں میمن مسجد، ایم اے جناح روڈ، خالق دینا ہال میں تراویح کے بڑے اجتماعات ہوئے، جہاں سیکیورٹی کے بھی سخت انتظامات کیے گئے تھے۔
