صدر آصف زرداری، وزیراعظم شہباز شریف نے رمضان کے آغاز پر قوم کے نام پیغام جاری کیا اور خیرات میں بڑھ چڑھ کر حصہ لینے کی اپیل کی ہے۔
تفصیلات کے مطابق صدر مملکت آصف علی زرداری کا ماہ صیام کے آغاز پر قوم کے نام پیغام میں کہنا تھا کہ پاکستانی قوم، امت مسلمہ کو رمضان کے بابرکت مہینے کے آغاز پرمبارکباد، قوم سے اپیل ہے اس مبارک مہینے میں خیرات و صدقات میں بڑھ چڑھ کر حصہ لیں، رمضان کا پیغام یہی ہے کہ ہم اپنی ذات سے بلند ہو کر دوسروں کی مدد کریں،
صدر نے کہا کہ رمضان المبارک رحمت، مغفرت اور جہنم سے نجات کا مہینہ ہے، رمضان تزکیہ نفس، صبر، استقامت، ہمدردی، مساوات اور اتحاد و یگانگت کا درس دیتا ہے۔
آصف علی زرداری نے کہا کہ رمضان المبارک تقویٰ، اخلاص اور قربِ الٰہی حاصل کرنے کا بہترین موقع ہے، رمضان میں غربا و مساکین کی حاجت روائی، ایثار و قربانی کے جذبے کو فروغ دیں۔
صدر نے کہا کہ رمضان مسلمانوں کیلئے انفرادی و اجتماعی سطح پر اصلاح کا ماحول پیدا کرتا ہے، رمضان اپنی زندگیوں کو ازسرنو شروع کرنے کا بہترین موقع فراہم کرتا ہے۔
علاوہ ازیں وزیراعظم شہباز شریف نے رمضان المبارک کے آغاز پر قوم کے نام پیغام میں کہا کہ اپیل ہے بابرکت مہینے میں زیادہ سے زیادہ غریبوں اور محتاجوں کی مدد کریں، رمضان کا اصل پیغام صبر، شکر، ہمدردی اور اخوت و ایثار ہے۔
شہباز شریف نے کہا کہ ماہ رمضان ہمیں دوسروں کے دکھ درد کا احساس دلاتا ہے، ہمیں اپنے آس پاس غریبوں اور محتاجوں کو بھی یاد رکھنا چاہیے۔
وزیراعظم کا کہنا تھا کہ ہمیں ظلم و جبر کے شکار لاکھوں فلسطینی اور کشمیری بہن بھائیوں کو بھی یاد رکھنا ہے، یہ وقت ہے ہم اُمت مسلمہ کے اتحاد کو مضبوط کریں اور باہمی تعاون کو فروغ دیں۔
دعا گو ہیں کہ اس مہینے کی برکت سے اللہ پاکستان کو استحکام نصیب فرمائے، اپنی دعاؤں میں فلسطین اور کشمیر کے مظلوم مسلمانوں اور اُمت مسلمہ کو یاد رکھیں۔
