اسلام آباد : صدر مملکت آصف زرداری کا کہنا ہے کہ چین کا عروج مثبت پیش رفت ہے اور اس سے خوفزدہ نہیں ہونا چاہیے۔
تفصیلات کے مطابق صدر آصف زرداری نے چائنہ میڈیا گروپ کو انٹرویو میں چین کی پرامن ترقی پر اعتماد کا اظہار کرتے ہوئے کہا کہ گزشتہ دہائیوں کے دوران چین کی تیزرفتارترقی اورتبدیلی سے بے حد متاثر ہوں، جب آؤ لگتا ہے کہ کسی نئے شہر آگیا ہوں۔
صدر مملکت کا کہنا تھا کہ دیرینہ دوست ہونے کےناطےجانتےہیں چین کبھی دوسرے ممالک کے اندرونی معاملات میں مداخلت نہیں کرتا۔
انھوں نے کہا کہ چین کے عروج سے خوفزدہ نہیں ہونا چاہیے، یہ مثبت پیشرفت ہے، چین کی ترقی دنیا کیلئےاچھی چیز ہے۔
انہوں نے چین کے پرامن ارادوں اور دونوں ملکوں کے درمیان مضبوط دوستی پر اپنے اعتماد کا اعادہ کیا اور عدم مداخلت کی تاریخ اور دیرینہ ہمسایہ تعلقات کا بھی حوالہ دیا۔
صدر مملکت کا مزید کہنا تھا لپ چین کے ہر شخص کا اپنے شعبے میں بہترین کام ہے، جو قوم کے اجتماعی فائدے کا باعث بن رہا ہے۔
یاد رہے صدر مملکت فروری کے پہلے ہفتے میں اپنے چینی ہم منصب صدر شی جن پنگ کی دعوت پر چین پہنچے تھے، بیجنگ میں قیام کے دوران صدر زرداری نے نائب وزیراعظم اور وزیر خارجہ اسحاق ڈار، وزیر داخلہ محسن نقوی، سینیٹر سلیم مانڈوی والا اور ڈاکٹر عاصم حسین پر مشتمل وفد کے ہمراہ صدر شی اور وزیراعظم لی کیانگ سمیت چینی قیادت سے مختلف ملاقاتیں کیں۔
اس دورے میں چین پاکستان اقتصادی راہداری (منصوبوں میں تیزی لانے، چینی شہریوں کے لیے حفاظتی اقدامات، سائنس و ٹیکنالوجی، قابل تجدید توانائی، انفراسٹرکچر اور زراعت کے شعبوں میں تعاون کو فروغ دینے اور باہمی دلچسپی کے دیگر مختلف امور پر تبادلہ خیال کیا گیا۔
مزید برآں، دونوں ممالک نے پاکستانی اور چینی کاروباری اداروں کے درمیان مفاہمت کی ایک یادداشت پر بھی دستخط کیے تھے۔
