یوکرینی صدر نے ریاض میں جنگ بندی کیلئے روس امریکا مذاکرات کو مسترد کر دیا۔
خبر ایجنسی کے مطابق یوکرین کے صدر زیلنسکی نے سعودی عرب کا دورہ ملتوی کر دیا ہے جہا امریکا اور روس کے وزرائے خارجہ اعلیٰ سفارتی وفد کے ہمراہ یوکرین جنگ کے خاتمے کے لیے مذاکرات کر رہے ہیں۔
انقرہ میں گفتگو کرتے ہوئے زیلنسکی نے کہا کہ ریاض مذاکرات کےلیے مدعو نہیں کیا گیا، جنگ کیسے ختم کی جائے یہ فیصلہ یوکرین کے بغیر نہیں ہو سکتا۔
یوکرین کے صدر زیلنسکی کو کل مذاکرات کےلیے ریاض پہنچنا تھا۔
تین سال قبل کریملن کے یوکرین پر مکمل حملے کے بعد دونوں ممالک کے درمیان پہلی بار اعلیٰ سطح بات چیت کے لیے امریکا اور روسی حکام نے سعودی عرب میں ملاقات کی ہے۔
امریکی وزیر خارجہ مارکو روبیو اور روس کے وزیر خارجہ سرگئی لاوروف نے دیگر اعلیٰ حکام کے ساتھ منگل کی صبح ریاض کے دریہ محل میں ملاقات کی۔
ان مذاکرات میں، جس میں یوکرین میں جنگ کے خاتمے کے لیے راہ تلاش کرنے کے امکانات پر تبادلہ خیال کیا گیا، نہ کیف اور نہ ہی یورپی نمائندے شامل تھے۔
چار گھنٹے سے زائد عرصے تک جاری رہنے والی اس بات چیت میں یوکرینی یا یورپی حکام کی غیر موجودگی نے امریکی صدر ڈونلڈ ٹرمپ کے دور میں امریکی خارجہ پالیسی میں حیران کن تبدیلی کی تصدیق کی۔
انہوں نے تجویز کیا کہ یوکرین کے لیے امریکی امداد ختم ہو سکتی ہے اور یہ کہ کیف کو ممکنہ طور پر علاقہ چھوڑنا پڑے گا۔
کریملن کے خارجہ امور کے مشیر، یوری اُشاکوف نے روسی سرکاری ٹیلی ویژن کو بتایا کہ یہ مذاکرات "سنجیدہ” تھے لیکن یہ کہنا مشکل ہے کہ آیا ماسکو اور واشنگٹن کی پوزیشنیں یکجا ہوئی ہیں۔
انہوں نے کہا کہ ہم نے اپنے اصولی موقف پر تبادلہ خیال کیا اور اس کا خاکہ پیش کیا، اور اس بات پر اتفاق کیا کہ مذاکرات کاروں کی الگ الگ ٹیمیں وقت پر اس موضوع پر رابطے میں رہیں گی۔
