تہران: ایران میں صدارتی انتخابات کے لیے پولنگ مکمل ہو گئی، ووٹوں کی گنتی جاری ہے۔
تفصیلات کے مطابق ایران میں صدارتی انتخابات کے لیے پولنگ کا عمل پُرامن طریقے سے مکمل ہو گیا ہے، اور ووٹوں کی گنتی جاری ہے، ابتدائی نتائج میں مسعود پزیشکیان کو برتری حاصل ہوئی ہے۔
پولنگ گزشتہ روز صبح 8 بجے شروع ہوئی، جس میں رات 12 بجے تک توسیع کی گئی تھی، صدارتی انتخابات میں ایرانی شہریوں کی بڑی تعداد نے شرکت کی۔
نتائج کا اعلان کل کیا جائے گا، صدارت کے لیے سعید جلیلی، محمد باقر، مسعود پزیشکیان اور مصطفیٰ پور محمدی مدِ مقابل ہیں، سابق ایرانی صدر ابراہیم رئیسی کی حادثاتی موت کے باعث ایران میں قبل از وقت انتخابات منعقد کیے گئے ہیں۔
ایران کی سرکاری میڈیا نے رپورٹ کیا ہے کہ 14 ملین سے زیادہ ووٹوں کی گنتی کر لی گئی ہے، جس میں پزیشکیان نے 5.9 ملین جب کہ جلیلی نے 5.5 ملین ووٹ حاصل کیے ہیں، محمد باقر کو 1.89 ملین ووٹ، جب کہ مصطفیٰ پور محمدی کو 111,900 سے زیادہ ووٹ ملے ہیں۔
