کراچی : شہر قائد میں مرغی کی قیمتیں آسمان سے باتیں کرنے لگی اور قیمت چھے سو روپے فی کلو پر پہنچ گئی۔
تفصیلات کے مطابق سردی کےموسم میں شہریوں کے لیے چکن کھانا بھی محال ہوگیا، پولٹری فارمرز نے فیڈ کی قیمتوں میں اضافے کو جواز بنا کر مرغی کی قیمتوں میں من مانا اضافہ کر دیا۔
مرغی کی فی کلو قیمت میں 100 روپے اضافہ کیا گیا ، جس کے بعد فی کلو مرغی کی قیمت 500 سے بڑھ کر 600 روپے تک پہنچ گئی۔
زندہ مرغی 4 سوروپے کلو گرام تک فروخت کی جارہی ہے، گزشتہ 2 روز کے دوران 100 روپے فی کلو کا اضافہ ہو چکا ہے جبکہ ایک ماہ کے دوران مرغی کی فی کلو قیمت میں 2 سو روپے کا اضافہ ہوا ہے۔
شہریوں کا کہنا ہے کہ مرغی کھائیں یا جیب دیکھیں، بجلی مہنگی،پیٹرول مہنگا ،گیس غائب اب مرغی اور گائے کے گوشت کی قیمت میں زیادہ فرق نہیں رہا۔
دوسری جانب دکانداروں نے ملبہ پولٹری فارمرز پر گرادیا اور کہا پولٹری فارم سے ہی مہنگی آرہی ہے۔ جبکہ فارمرز کا کہنا ہے کہ فیڈ مہنگی ہو گئی ہے جس سے مرغی کا ریٹ بڑھایا ہے۔
