شنگھائی : چین میں عمران خان اور روسی وزیر اعظم کی ملاقات ہوئی، ملاقات میں دونوں رہنماؤں نے دوطرفہ تعلقات بڑھانے پر اتفاق کیا، وزیر اعظم نے اپنے ہم منصب کو پاکستان میں سرمایہ کاری کی پیشکش کی۔
تفصیلات کے مطابق چین میں شنگھائی درآمدی نمائش کی افتتاحی تقریب کے موقع پر وزیر اعظم عمران خان اور روسی وزیر اعظم دمتری مدودو کے درمیان ملاقات ہوئی۔ خوشگوار ماحول میں ہونے والی ملاقات موقع پر وزیر خارجہ شاہ محمود قریشی، وزیر خزانہ اسد عمر اور مشیر تجارت عبد الرزاق داؤد بھی موجود تھے۔
دونوں رہنماؤں کی ملاقات میں عالمی اور علاقائی صورتحال سمیت دو طرفہ باہمی دلچسپی کے امور پر گفتگو ہوئی، ملاقات میں پاکستان اور روس کی جانب سے دوطرفہ تعلقات بڑھانے پر بھی اتفاق کیا گیا، دونوں وزرائے اعظم نے دوطرفہ تعلقات پر اطمینان کا اظہار کیا، اس موقع پر اقتصادی، تجارتی، دفاعی اور توانائی کے شعبوں میں تعاون کا جائزہ لیا گیا ۔
Prime Minister Imran Khan met #Russian Prime Minister Dmitry Medvedev in #Shanghai.
Minister for Foreign Affairs Shah Mehmood Qureshi, Minister for Finance Asad Umar & Adviser to PM on Commerce Mr. Abdul Razzak Dawood were also present during the meeting. #PMIKatCIIE 🇵🇰🇨🇳 pic.twitter.com/L3wRm9LLsG— Govt of Pakistan (@pid_gov) November 5, 2018
وزیر اعظم عمران خان کا کہنا تھا کہ باہمی مفادات کے شعبوں میں تعاون مزید بڑھانا ہوگا، عمران خان نے روسی ہم منصب کو پاکستان میں سرمایہ کاری کی پیشکش کی، وزیر اعظم نے پاکستان میں توانائی کے شعبے میں روسی سرمایہ کاری کا خیر مقدم کیا۔
روسی وزیر اعظم دمتری مدودو نے انتخابات میں کامیابی پر وزیراعظم عمران خان کو مبارکباد دیتے ہوئے کہا کہ تیزی سے بدلتے حالات کے پیش نظر پاک روس تعلقات کو مزید وسعت دینا ہوگی۔
علاوہ ازیں ملاقات میں جنوبی ایشیا بالخصوص افغانستان کے علاقائی مسائل پر بھی تبادلہ خیال اور دونوں رہنماؤں کی جانب سے شنگھائی تعاون تنظیم میں تعاون بڑھانے پر بھی اتفاق کیا گیا۔
خیال رہے وزیر اعظم عمران خان 5 روزہ دورے پر چین میں موجود ہیں، عمران خان کا وزیر اعظم منتخب ہونے کے بعد چین کا یہ پہلا دورہ ہے جو یکم نومبر کو شروع ہوا تھا۔
وزیر اعظم عمران خان نے آج شنگھائی میں درآمدی نمائش کی افتتاحی تقریب سے بھی خطاب کیا۔
نمائش میں وزیر اعظم عمران خان اور روسی صدر ولادی میر پیوٹن سمیت مختلف ممالک کے سربراہان اور 130 ممالک کی 3 ہزار سے زائد کمپنیاں شریک ہیں۔
