وزیراعظم شہباز شریف نے اداروں کے خلاف غلیظ مہم چلانے والوں سے آہنی ہاتھوں سے نمٹنے کی ہدایت کردی۔
وزیر اعظم شہباز شریف نے ایک بیان میں کہا کہ آرمی چیف کیخلاف مہم ناقابل برداشت، اداروں کیخلاف سازش کا تسلسل ہے، بیرون ملک محب وطن پاکستانی فارن فنڈڈ مہم کیخلاف آواز بلند کریں۔
وزیر اعظم کا کہنا تھا کہ زہریلی سیاست کو بیرون ملک پاکستانیوں کے ذریعے پھیلا رہے ہیں، بیرون ملک پاکستانی اس سازش کاحصہ نہ بنیں، عمران خان اداروں اور انکےسربراہوں کو اپنی سیاست میں گھسیٹ کرآئین شکنی کررہے ہیں۔
وزیر اعظم شہبازشریف نے کہا کہ وزیر داخلہ ملک کے اندر غلیظ مہم چلانے والوں سے آہنی ہاتھوں سے نمٹیں، افراتفری، فساد اور بغاوت کو ہوا دینے والوں کیخلاف سخت قانونی کارروائی کی جائے۔
وزیراعظم شہبازشریف نے مزید کہا کہ پہلی بارمیرٹ پر لگنے والے آرمی چیف کیخلاف مہم ملک دشمنوں کا ایجنڈا ہی ہوسکتا ہے، قوم اپنے اداروں کے ساتھ کھڑی ہے، شرپسندوں کے خلاف متحد ہے۔
