لندن: برطانوی شہزادہ چارلس 7 روز آئسولیشن میں گزارنے کے بعد باہر آگئے۔
غیرملکی خبررساں ادارے کی رپورٹ کے مطابق برطانوی شہزادہ چارلس 7 روز آئسولیشن میں گزارنے کے بعد باہر آگئے، شہزادہ چارلس کا کرونا وائرس ٹیسٹ مثبت آیا تھا۔
کلیئرنس ہاؤس کی جانب سے جاری کردہ بیان کے مطابق شہزادہ چارلس کی جانب سے ڈاکٹر کے مشورے کے بعد آئسولیشن ختم کرنے کا فیصلہ کیا گیا ہے۔
رپورٹ کے مطابق شہزادی کمیلا کا کرونا وائرس ٹیسٹ منفی آیا تھا لیکن انہوں نے خود کو آئسولیٹ کیا تھا اور وہ رواں ہفتے کے آخر تک آئسولیشن میں رہیں گی۔
مزید پڑھیں: برطانوی چیف میڈیکل افسر کرونا وائرس میں مبتلا
واضح رہے کہ 7 روز قبل شہزادہ چارلس میں میں کرونا وائرس کی تصدیق ہوئی تھی جس کے بعد انہیں قرنطینہ منتقل کردیا گیا تھا، شہزادہ چارلس ملکہ الزبتھ کے سب سے بڑے بیٹے ہیں اور ان کی عمر 71 برس ہے۔
خیال رہے کہ برطانیہ میں کرونا وائرس کے کیسز کی تعداد 19522 تک جاپہنچی ہے اور وائرس سے 1228 افراد ہلاک ہوچکے ہیں۔
یاد رہے کہ تین روز قبل برطانوی وزیراعظم بورس جانسن اور وزیر صحت میٹ ہینکاک کے بعد چیف میڈیکل افسر کرس ویٹی میں بھی کرونا وائرس کی تشخیص ہوئی تھی جس کے بعد وہ 7 روز کے لیے قرنطینہ میں چلے گئے تھے۔
