اسلام آباد: برطانوی شاہی جوڑے کی آمد سے متعلق خیرسگالی پیغام جاری کیا گیا ہے، خیرسگالی پیغام کی ویڈیو برطانوی ہائی کمشنر تھامس ڈریو نے جاری کی ہے۔
تفصیلات کے مطابق ڈیوک اینڈ ڈچز آف کیمبرج کے پاکستانی دورے کی تفصیلات سامنے آگئیں، برطانوی ہائی کمشنر تھامس ڈریو کا کہنا ہے کہ شاہی جوڑا اسلام آباد، لاہور اور مغربی حصوں کا دورہ کرے گا۔
برطانوی ہائی کمشنر کے مطابق شاہی جوڑا دورے میں پاکستانیوں سے بھی ملاقات کرے گا، ملاقاتوں میں نوجوانوں کو خصوصی اہمیت دی جائے گی۔
تھامس ڈریو کا کہنا ہے کہ شاہی جوڑے کا پاکستان کا دورہ ماضی کی روایات کا تسلسل ہے، برطانیہ پاکستان سے دیرپا اور مستحکم تعلقات کا خواہش مند ہے۔
برطانوی ہائی کمشنر نے کہا کہ شاہی جوڑے کا دورہ مسرتوں بھرا ہوگا، امید ہے شاہی جوڑے کو بھرپور طریقے سے خوش آمدید کہا جائے گا۔
We’re in the final countdown to the arrival in Pakistan of the Duke and Duchess of Cambridge. Here is a flavour of what to expect. #RoyalVisitPakistan pic.twitter.com/zvg0MkTkNa
— Thomas Drew (@TomDrewUK) October 13, 2019
واضح رہے کہ شاہی جوڑا 15 اکتوبر کو وزیراعظم عمران خان سے ملاقات کرے گا، شہزادہ ولیم اور ان کی اہلیہ کیٹ مڈلٹن کل شب ساڑھے 9 بجے پاکستان پہنچیں گے۔
جمعرات کو شہزادہ اور شہزادی چترال روانہ ہوں گے، اسی روز ان کے درہ خیبر اور قلعہ خیبر کا دورہ بھی متوقع ہے تاہم یہ بہتر موسمی حالات سے مشروط ہوگا۔
برطانوی شاہی جوڑا جمعرات کی رات واپس وفاقی دارالحکومت پہنچے گا۔ 18 اکتوبر یعنی جمعے کو ان کے فیصل مسجد کے دورے کا بھی امکان ہے۔ برطانوی شاہی جوڑا 18 اکتوبر دوپہر ڈیڑھ بجے نور خان ائیر بیس سے وطن واپس روانہ ہو جائے گا۔
