کراچی : نجی گاڑیوں کی نمبرپلیٹوں پر سرکاری نمبرپلیٹ جیسے کلر پر کارروائی کا آغاز کردیا گیا، قانون کی خلاف ورزی کرنے والے مالکان کیخلاف مقدمہ درج کیا جائے گا۔
اس حوالے سے ذرائع کا کہنا ہے کہ آئی جی سندھ غلام نبی میمن نے غیرقانونی ہری، نیلی نمبرپلیٹس کیخلاف حکم نامہ جاری کردیا ہے جس کے بعد ٹریفک پولیس کی جانب سے ایم اے جناح روڈ پر باقاعدہ مہم شروع کردی گئی ہے۔
پولیس حکام نے بتایا کہ مہم کے دوران قانون کی خلاف ورزی کرنے والے گاڑی مالکان کو روکا جارہا ہے، اس دوران ہرے رنگ کی نمبر پلیٹ لگی گاڑی کے ڈرائیور نے ٹریفک اہلکار کو کچلنے کی کوشش کی۔
ٹریفک پولیس ڈرائیور کو روکنے کی کوشش کرتی رہی، ٹریفک پولیس افسر اور کار ڈرائیور کے درمیان تلخ کلامی ہوئی، اس موقع پر ایک اور سرکاری نمبر پلیٹ والا ڈرائیورٹریفک اہلکاروں کو ٹکرمارتا ہوا بھاگ گیا۔
بھاگتے کار سوار نے موٹرسائیکل سوار شہری کو بھی ٹکر ماری، گاڑیوں سےغیرقانونی نمبرپلیٹس اور نیلی لائٹیں اتاری جارہی ہیں۔
ذرائع کے مطابق آئی جی سندھ کی جانب سے25 جولائی کو کارروائی کے احکامات جاری کیے گئے تھے، مون سون برسات کی وجہ سے مہم فوری شروع نہیں کی گئی تھی۔
غیرقانونی نمبر پلیٹس، پولیس لائٹس کیخلاف مہم کا آغاز کیا ہے، آئی جی کا کہنا ہے کہ شاہراہوں، ہائی ویز پر نجی کاروں پر ہری، نیلی نمبرپلیٹس ہوتی ہیں، اس عمل کے خلاف سخت کارروائی کی جائے۔
آئی جی سندھ کا کہنا ہے کہ نجی گاڑیوں پر بلیو اور گرین نمبرپلیٹس کا استعمال غیرقانونی عمل ہے، جس کیلئے ایف آئی آرز اندراج سمیت تمام ترضروری قانونی کارروائی اشد ضروری ہے۔
انہوں نے کہا کہ تمام ضلعی افسران فی الفورایک ٹھوس اورمربوط مہم کا فوری آغاز کریں، غیرقانونی عمل میں ملوث پولیس افسران، اہلکاروں کیخلاف بھی کارروائی کی جائے، مذکورہ مہم اگلے3 ماہ تک جاری رہے گی۔
