کراچی : سندھ ہائیکورٹ نے حکم دیا ہے کہ طلباء و طالبات کو فیسوں میں20فیصد رعایت نہ دینے والے اسکولوں کیخلاف سخت کارروائی کی جائے۔
تفصیلات کے مطابق سندھ ہائیکورٹ میں نجی اسکولوں میں کورونا وائرس کی وباء کے دوران فیسوں میں رعایت نہ دینے سے متعلق درخواست کی سماعت ہوئی،دوران سماعت عدالت نے فیس میں بیس فیصد رعایت نہ دینے والے اسکولوں کیخلاف سخت کارروائی کا حکم دے دیا۔
عدالت نے ڈی جی پرائیوٹ اسکولز کو ہدایت دی کہ اسکول فیسوں میں بیس فیصد رعایت کے قانون پر سختی سے عملدرآمد کرائیں، اس کے علاوہ والدین فیسوں میں رعایت نہ دینے والے اسکولوں کیخلاف شکایت درج کرائیں, شکایات ملنے پر ڈی جی پرائیویٹ اسکولز نجی اسکولوں کے خلاف کارروائی کریں۔
عدالت نے حکم دیا کہ فیصلے پر عملدرآمد کی رپورٹ بیس دن میں پیش کی جائے، اس موقع پر ڈی جی پرائیوٹ اسکولز نے عدالت کو فیسوں میں کمی نہ کرنے والے اسکولوں کیخلاف کارروائی کی یقین دہانی کرائی۔
مزید پڑھیں : سندھ حکومت نے اسکول فیسوں میں کمی کا نیا نوٹی فکیشن جاری کردیا
درخواست کی سماعت کے دوران سندھ حکومت کی جانب بھی اس رعایت پر کوئی اعتراض نہیں کیا گیا، بعد ازاں عدالت نے تمام فریقین کی رضامندی کے بعد درخواست نمٹادی۔
