اسلام آباد : وزیراعظم شہباز شریف نے بلوچستان عوامی پارٹی کے اہم رہنماؤں کو مسلم لیگ ن میں شمولیت کی دعوت دے دی، تاہم رہنماوں نے شمولیت کے باقاعدہ اعلان کیلئے وقت مانگ لیا۔
تفصیلات کے مطابق بلوچستان عوامی پارٹی کے سینٹرز اور صوبائی وزراء سمیت متعدد رہنماؤں اور پی ٹی آئی کے اہم بلوچ رہنما کی وزیراعظم شہباز شریف سے رات گئے خفیہ ملاقات ہوئی۔
ذرائع نے بتایا کہ یہ ملاقات گزشتہ رات دس بجے وزیراعظم ہاوس میں ہوئی، ملاقات کرنے والوں میں باپ پارٹی کے دو سینیٹرز سرفراز بگٹی اور انوارالحق کاکڑ کے علاوہ صوبائی وزراء سردار مسعود لونی، حاجی محمد خان لہڑی اورطور اتماتخیل شامل تھے۔
اس کے علاوہ نواب چنگیز مری، عاصم گیلو، میرعبدلاغفورلہڑی، میردوستین ڈومکی، میر طارق مسوری، میرشعیب نوشیروانی، خرم فتح، اسد خان بلدی، علی گوہر، خان شیر، جعفرکریم بھنگراورپی ٹی آئی کے میر شوکگ بنگلزئی نے بھی وزیراعظم سے ملاقات کی۔
وزیراعظم کے ساتھ رانا ثناءاللہ، احسن اقبال، خواجہ سعد رفیق اوراسحاق ڈاربھی موجود تھے۔
خیال رہے اےآروائی نیوزنے چھبیس جولائی کو یہ خبرنشرکی تھی کہ نون لیگ کی جانب سے بلوچستان کے رہنماوں کو شمولیت کی دعوت دی جائے گی جبکہ دو دن پہلے بی اے پی کے سینیٹر دنیش کمار نے بھی اے آر وائی نیوز کو انٹرویو میں تصدیق کی تھی کہ عنقریب بڑی وفاقی جماعت ہمارے ارکان پر حملہ آور ہوگی۔
