نئی دہلی: بھارت میں نام نہاد یوم جمہوریہ کے دن پر احتجاج کرنے اور توڑ پھوڑ کے الزام میں نامور بھارتی اداکار کو گرفتار کرلیا گیا۔
بھارتی میڈیا رپورٹس کے مطابق پنجابی اداکار دیپ سدھو کو دہلی پولیس کے اسپیشل سیل نے گرفتار کیا، ایک ہفتے قبل دلی پولیس نے اعلان کیا تھا کہ اداکار دیپ سدھو کی معلومات دینے والے کو ایک لاکھ روپے انعام دیا جائے گا۔
واضح رہے کہ دیپ سدھو 2019 میں بھارتی انتخابات میں بی جے پی کے امیدوار سنی دیول کی انتخابی مہم چلانے والے اہم شخص تھے۔
انتخابات میں کامیاب ہونے والے بی جی پی کے ممبر پارلیمنٹ سنی دیول نے حالیہ احتجاج میں دیپ سدھو کا نام منظر عام پر آنے کے بعد ان سے لاتعلقی کا اعلان کیا تھا۔
یاد رہے کہ بھارت میں کسانوں کا احتجاج ہر گزرتے دن کے ساتھ شدت اختیار کرتا جارہا ہے، ایسے میں گزشتہ ماہ 26 جنوری کو بھارت کے یوم جمہوریہ کے موقع پر کسانوں ٓکی جانب سے ٹریکٹر مارچ کیا گیا تھا۔
اس احتجاج میں نامور بھارتی اداکارہ سنی دیول کے دوست دیپ سدھو کا نام بھی سامنے آرہا تھا تاہم اب انہیں گرفتار کیا جاچکا ہے۔
خیال رہے کہ کسانوں کے احتجاجی مارچ کو نئی دلی انتظامیہ نہیں روک پائی اور اپنے حق کے لیے لڑنے والے مظاہرین نئی دلی کے لال قلعہ پر چڑھ گئے اور اپنا پرچم بھی وہاں سربلند کردیا تھا۔
