اسلام آباد: وزیراعظم عمران خان کا کہنا ہے کہ ملک میں ٹیکنالوجی اور جدید ریسرچ کا فروغ نہایت ضروری ہے۔

تفصیلات کے مطابق وفاقی دارالحکومت اسلام آباد میں وزیر اعظم عمران خان سے برطانیہ میں مقیم سائنسدانوں کے وفد نے ملاقات کی۔ وفاقی وزیر برائے سائنس اینڈ ٹیکنالوجی فواد چوہدری بھی ملاقات میں موجود تھے۔

وزیراعظم عمران خان نے کہا کہ پاکستانی اور بین الاقوامی اداروں کے درمیان روابط اور پارٹنر شپ بڑھےگی۔ وزیراعظم کی جانب سے سائنس دانوں پر مشتمل وفد کا خیرمقدم کیا گیا۔

عمران خان کا کہنا تھا کہ سائنس،ٹیکنالوجی کا فروغ حکومت کی اولین ترجیحات میں شامل ہے، ملک میں ٹیکنالوجی اور جدید ریسرچ کا فروغ نہایت ضروری ہے۔

انہوں نے برطانیہ میں قابلیت کا لوہا منوانے والی پاکستانی نژاد کمیونٹی کا ذکر کرتے ہوئے کہا کہ جدیدعلوم کے فروغ میں ایسے افراد کی قابلیت سے استفادہ ملکی مفاد میں ہے۔

واضح رہے کہ برطانیہ کےتعلیمی، تحقیقاتی اداروں کے 70سائنسدانوں کا وفدپاکستان میں موجود ہے، وفد ایگریکلچر نیوٹریشن، ہیلتھ کیئر، بائیو ٹیکنالوجی فروغ پر مبنی ورکشاپ میں شرکت کر رہا ہے۔ ورکشاپ کا مقصد ان شعبہ جات میں جدیدعلوم، تجربات اور معلومات کا تبادلہ ہے۔