امریکی صدر ڈونلڈ ٹرمپ کے پاکستان مخالف بیان پر پاکستانی شہریوں میں شدید غم و غصہ پایا جاتا ہے، شہر شہر ڈونلڈ ٹرمپ کے بیان کے خلاف احتجاج کا سلسلہ جاری ہے، مظاہرین نے امریکہ کے خلاف نعرے لگائے اور ٹرمپ کا پتلا جلایا۔
تفصیلات کے مطابق امریکی صدرڈونلڈٹرمپ کے پاکستان مخالف بیان پر مختلف شہروں میں احتجاج کا سلسلہ جاری ہے، بلوچستان کے شہروں چمن پنجگور اور کوہلو میں امریکی صدر کے بیان کے خلاف احتجاج جاری ہے، قبائلی عوام ،انجمن تاجران ، مذہبی وسیاسی جماعتٰیں سڑکوں پر نکل آئیں۔
ژوب سمیت سبی ڈیرہ مراد جمالی، سوات، ڈیرہ بگٹی اور چاغی میں امریکی صدر کیخلاف احتجاجی ریلیاں نکالیں، مظاہرین نے سڑکیں بند کردیں، مظاہرین نے امریکہ کے خلاف شدید نعرے بازی کی اور امریکہ مردہ باد کے نعرے لگائے۔
مظاہرین نے امریکی پرچم پر جوتے مارے اور پرچم نذر آتش بھی کیا۔
کشمورمیں امریکی صدر کیخلاف اور پاک فوج کی حمایت میں ریلی نکالی گئی، شکار پورمیں طلبا امریکی صدر اور بھارت کیخلاف سڑکوں پر نکل آئے ، کبیر والا میں بھی جماعت اہلسنت پاکستان نے احتجاج کیا، مظاہرین کا کہنا تھا حکومت امریکی امداد لینا فوری بند کر دے
ٹنڈو محمد خان میں پاکستان تحریک انصاف اور سول سوسائٹی کی جانب سے امریکی صدر ڈونالڈ ٹرمپ کے خلاف انصاف ہاوٴس سے پریس کلب تک ریلی نکالی گئی اور پھلیلی پل پر دھرنا دیا، اس موقع پر مظاہرین نے امریکی صدر ڈونالڈٹرمپ کا پتلا اور امریکی پرچم نذرآتش کیا اور سخت نعرے بازی کی۔
اس موقع پر حسن نظامانی آفتاب نظامانی اسحاق سومرو خداداد نظامانی شعیب خان انصار شر اور دیگر نے خطاب کرتے ہوئے کہا کہ امریکہ افغانستان میں امریکی اور نیٹو فوج کی ناکامی کا سارا ملبہ پاکستان پر ڈالنا چاہتاہے لیکن اگر امریکہ نے پاکستان کی طرف میلی آنکھ سے بھی دیکھا تو پاکستان کو امریکہ کا قبرستان بنادینگے۔
اگرآپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اوراگرآپ کو یہ مضمون پسند آیا ہے تو اسے اپنی فیس وال پر شیئر کریں۔