پاکستان سپر لیگ ٹین (پی ایس ایل10) کا شاندار آغاز ہوگیا، ٹیموں کی آمد و رفت کے حوالے سے اسلام آباد ٹریفک پولیس نے شہریوں کیلئے متبادل راستوں کا اعلان کردیا۔
اسلام آباد میں ٹریفک پولیس کے روٹ پلان کے مطابق ٹریفک کی روانی برقرار رکھنے کے لیے 300 سے زائد افسران و اہلکار ڈیوٹیز پر موجود ہوں گے۔
اسلام آباد ٹریفک پولیس کی جاری ٹریفک ایڈوائزری کے مطابق پی ایس ایل کرکٹ ٹیمز کی آمد و رفت کے باعث 12 اپریل 2025، 12:30 بجے سے 01:30 بجے رات تک مختلف اوقات میں، فیض آباد ایکسپریس ہائی وے، کلب روڈ، مری روڈ، فیصل ایونیو، نائنتھ ایونیو اور سری نگر ہائی وے پر غیر معمولی سیکورٹی انتظامات کیے گئے ہیں۔
روٹ کے باعث ایکسپریس ہائی وے اور سری نگر ہائی وے پر ٹریفک کی روانی میں کچھ دیر کے تعطل آئے گا اور ٹریفک وقتی طور پر سست روی کا شکار ہوگی، شہری ایکسپریس ہائی وے اور سری نگر ہائی وے سے منسلک سروس روڈ کا استعمال کریں، اس کیلئے بلیو ایریا، سیکٹر F-6 اور F-7 کی جانب سفر کے لیئے ایچ 8 انڈر پاس کا استعمال کیا جائے۔
ریڈ زون اور سرینا ہوٹل آنے جانے والی ٹریفک مارگلہ روڈ، جناح ایونیو، ایوب چوک اور نادرا چوک کا استعمال کرے، بری امام جانے والے شہری نادرا چوک کا استعمال کریں۔ سیکٹر آئی اور ایچ کے لئے راولپنڈی پشاور روڈ، آئی جے پی روڈ سے سروس روڈ کا استعمال کریں۔
PSL 10- مزید پڑھیں : پی ایس ایل کی تمام خبریں
ٹیمز کی آمد و رفت کے دوران ہیوی ٹریفک کا داخلہ اسلام آباد میں ممنوع ہے، مری روڈ سے سرینہ اور فیض آباد براستہ راول ڈیم دوران آمد و رفت بند رہے گی۔
چیف ٹریفک آفیسر کیپٹن (ر)سید ذیشان حیدر نے کہا ہے کہ شہریوں کی رہنمائی کے لیئے اسلام آباد ٹریفک پولیس مختلف مقامات پر موجود رہے گی، کسی بھی سفری دشواری سے بچنے کے لئے شہری 20 منٹ کا دورانیہ رکھ کر گھر سے نکلیں۔
انہوں نے بتایا کہ سفر کے دوران کسی بھی پریشانی اور رہنمائی کے لیے ہیلپ لائن 1915 پر رابطہ کریں، ٹریفک پولیس کا سوشل میڈیا پلیٹ فارم شہریوں کو بروقت ٹریفک روٹس سے متعلق آگاہی کے لئے موجود ہے۔
