پاکستان کے بڑے کھیلوں کے ایونٹ پی ایس ایل کے نئے سیزن کے لیے ٹکٹوں کی فروخت کے لیے تاریخ کا اعلان کر دیا گیا۔
پاکستان سپر لیگ سیزن 10 کی ٹکٹوں کی فروخت 3 اپریل سے شروع ہو گی جو کہ جمعرات کو سہ پہر 3 بجے PCB.tcs.com.pk پر آن لائن دستیاب ہوں گی۔
7اپریل سے ملک بھر کے ٹی سی ایس ایکسپریس سینٹرزپر بھی ٹکٹس دستیاب ہوں گے۔
پی ایس ایل میچز کراچی، لاہور، ملتان، راولپنڈی میں کھیلے جائیں گے جب کہ ایونٹ کا فائنل 18 مئی کو قذافی اسٹیڈیم لاہور میں ہو گا۔
پی ایس ایل کے چاروں وینیوز کے عام ٹکٹ 650 روپے میں دستیاب ہوں گے۔ افتتاحی میچ کے ٹکٹ 1000 روپے سے 8500 روپے تک دستیاب ہوں گے۔
ایچ بی ایل پاکستان سپر لیگ سیزن 10 کا آغاز جمعہ، 11 اپریل 2025 کو ہوگا، جبکہ کراچی کنگز اپنا پہلا میچ ہفتہ، 12 اپریل 2025 کو اپنے ہوم گراؤنڈ، نیشنل بینک اسٹیڈیم، کراچی میں ملتان سلطانز کے خلاف کھیلے گی۔
شائقین کو ایک شاندار کرکٹ کا مظاہرہ دیکھنے کو ملے گا، جہاں وارنر کی قیادت میں کراچی کنگز ایک بار پھر ایچ بی ایل پی ایس ایل ٹرافی جیتنے کے لیے پر عزم ہے۔
