The news is by your side.

Advertisement

پی ایس ایل 6: ’’گروو میرا‘‘ پر مزاحیہ میمز کی بھرمار

کراچی: پاکستان سپر لیگ (پی ایس ایل) کا نیا گانا ’’گروو میرا‘‘ مداحوں کی توقعات پر پورا نہ اتر سکا، مداح گانا سن کر برہم ہوگئے اور مزاحیہ میمز بنا ڈالیں۔

پی ایس ایل 6 کے نئے ترانے ’’گروو میرا‘‘ کو پاکستان کے فوک، پاپ اور ہپ ہاپ گلوکاروں نے گایا، فوک گلوکارہ نصیبو لعل، پاپ گلوکارہ آئمہ بیگ اور ہپ ہاپ اسٹارز ینگ اسٹنرز نے ترانے میں اپنی آواز کا جادو جگایا۔

تاہم گانا ریلیز ہوتے ہی سوشل میڈیا پر یہ ٹاپ ٹرینڈ کرنے لگا اور صارفین کی جانب اس پر خوب تنقید کی جارہی ہے۔

کسی نے لکھا یہ اب تک کا سب سے برا گانا ہے اس سے اچھا گانا تو پی ایس ایل فائیو کا تھا تو کوئی کہنے لگا کہ گانا سن کر مجھے چکر آرہے ہیں۔

مداحوں نے یہ بھی کہا کہ سیزن فائیو کا گانا ’تیار ہو‘ اس سے بہتر تھا، اس موقع پر مداح نے علی ظفر کو یاد کرتے ہوئے ان کے گائے پی ایس ایل کے ابتدائی ایونٹس کے گانوں کی ویڈیوز بھی شیئر کیں۔

واضح رہے کہ پی ایس ایل کے گانے علی ظفر کے بعد سے تنازعات کا شکار رہے ہیں، علی ظفر کے بعد فواد خان نے پی ایس ایل کا گانا گایا تھا جس کے بعد گزشتہ برس علی عظمت، عاصم اظہر اور عارف لوہار نے یہ گانا گایا تھا اور یہ بھی لوگوں کو پسند نہیں آیا تھا۔

سوشل میڈیا پر مداحوں کی جانب سے بنائی جانے والی دلچسپ میمز دیکھیں۔

Comments

یہ بھی پڑھیں