ایچ بی ایل پاکستان سپر لیگ کے پانچویں میچ میں آج دو دوست بابر اعظم اور محمد رضوان ایک دوسرے کے مدمقابل ہوں گے۔
اے آر وائی نیوز کے مطابق ایچ بی ایل پاکستان سپر لیگ 8 کے سنسنی خیز میچز جاری ہیں۔ آج ملتان میں دو دوست بابر اعظم اور محمد رضوان ایک دوسرے کے مدمقابل ہوں گے۔ پشاور زلمی اور ملتان سلطانز آج ایک دوسرے کو پچھاڑنے کے لیے میدان میں اتریں گی۔
پشاور زلمی نے ایونٹ میں ایک میچ کھیلا ہے اور اس میں فاتح رہی تھی جب کہ ملتان سلطانز اب تک دو میچ کھیل چکی ہے۔ ایک میں جیت اور ایک میں ہار ملی ہے۔
ہیڈ ٹو ہیڈ مقابلوں میں سلطانز کو سبقت حاصل ہے۔ دونوں ٹیموں کے درمیان اب تک پی ایس ایل کے 11 میچز کھیلے گئے ہیں جن میں 8 میں ملتان سلطانز نے فتح حاصل کی جب کہ زلمی 3 معرکے اپنے نام کرنے میں کامیاب رہی۔
پہلے بیٹنگ میں بھی 5 میچز میں جیت اپنے نام کرکے ملتان آگے نظر آتی ہے تاہم دوسری بیٹنگ میں دونوں ٹیموں نے تین تین میچز جیت رکھے ہیں۔
آج زلمی ایونٹ میں مسلسل دوسری جیت کا عزم لے کر میدان میں اترے گی تو سلطانز بھی اپنے ہوم گراؤنڈ پر کامیابی کا تسلسل برقرار رکھنے کی بھرپور کوشش کریں گے۔
پشاور کی بیٹنگ مضبوط ہے۔ کپتان بابر اور کیڈ مور حریف بولرز پر قہر بن کر ٹوٹ سکتے ہیں ساتھ بولنگ کے شعبے میں وہاب ریاض کے تجربے کا ساتھ بھی حاصل ہے۔ وہیں ملتان کو رضوان پر اعتماد ہے، رلی روسو بھی کسی سے کم نہیں، بولنگ میں نوجوان پیس بیٹری بالخصوص کوئٹہ کو سرپرائز دینے والے احسان اللہ پشاور کیلیے بھی مشکل کھڑی کرسکتے ہیں۔
یہ بھی پڑھیں: سابق بھارتی کرکٹر نے پی ایس ایل کی تعریفوں کے پُل باندھ دیے
میچ پاکستانی وقت کے مطابق رات ساڑھے 7 بجے شروع ہوگا۔ پی ایس ایل کے تمام میچز اے اسپورٹس پر براہ راست دکھائے جا رہے ہیں۔
