ایچ بی ایل پاکستان سپر لیگ 8 کا پلے آف مرحلہ آج سے شروع ہو رہا ہے فائنل میں جگہ بنانے کے لیے کوالیفائر میں آج دفاعی چیمپئن لاہور قلندرز اور ملتان سلطانز میں مقابلہ ہوگا۔
اے آر وائی نیوز کے مطابق دنیا کرکٹ کی مقبول ترین لیگز میں شامل پاکستان سپر لیگ 8 کی ٹرافی کی جنگ اب چار ٹیموں کے درمیان سمٹ آئی ہے۔ ایونٹ کے پلے آف مرحلے کا آج سے آغاز ہو رہا ہے۔ لاہور کے قذافی اسٹیڈیم میں کوالیفائر میں دفاعی چیمپئن لاہور قلندرز اور ملتان سلطانز پنجہ آزمائی کریں گے۔ فاتح ٹیم فائنل کا ٹکٹ کٹائے گی جب کہ ہارنے والی ٹیم کو فائنل میں جانے کے لیے ایلیمینیٹر 2 میں ایک اور موقع ملے گا۔
رواں ایونٹ میں اب تک لاہور قلندرز حریف ٹیموں پر بھاری رہے ہیں اور ابتدائی مرحلے کے 10 میں سے 7 میچ جیت کر پوائنٹس ٹیبل پر سرفہرست رہے۔
قلندرز کے مدمقابل آنے والی گزشتہ سال کی فائنلسٹ ٹیم ملتان سلطانز بھی کسی سے کم نہیں اس نے بھی 10 میچوں میں سے 6 میں فتح سمیٹی۔
ایونٹ میں اب تک اگر ملتان سلطانز کی بیٹنگ ٹاپ کلاس رہی ہے تو لاہور قلندرز کے بولرز بھی خطرناک ہیں۔
ایک جانب سلطانز کپتان رضوان، شان مسعود نے خوب رن بنائے ساتھ ہی ٹیم ڈیوڈ، پولارڈ اور روسو نے بلند وبلا چھکے لگائے تو قلندرز نے حریف بلے بازوں کی وکٹیں اڑا کر اپنی دھاک بٹھائی۔ شاہین شاہ، حارث رؤف، راشد خان اور زمان کے سامنے ملتان کے بیٹرز کا رنز بنانا آسان نہیں ہوگا۔
ہیڈ ٹو ہیڈ مقابلوں میں لاہور نے 8 جب کہ ملتان نے 7 میچز جیتے ہیں جب کہ رواں ایونٹ کے دونوں میچز میں فتح قلندرز نے اپنے نام کی ہے۔
پی ایس ایل 8 کے پلے آف مرحلے کا پہلا ہائی وولٹیج مقابلہ قذافی اسٹیڈیم میں آج شام 7 بجے شروع ہوگا۔ ایونٹ کے تمام میچز اے اسپورٹس پر براہ راست دکھائے جا رہے ہیں۔
