پاکستان سپر لیگ 9 کی ووننگ ٹرافی اٹھانے کے بعد فاتح ٹیم اسلام یونائیٹڈ کے کپتان شاداب خان نے اپنی فیملی سے ملے جس کی ویڈیو وائرل ہوگئی۔
اے آر وائی نیوز کے مطابق پی ایس ایل 9 کا ایک ماہ تک جانے والا کرکٹ کا سنسنی خیز میلہ گزشتہ شب اسلام آباد کے چیمپئن بننے کے ساتھ اختتام پذیر ہو گیا۔ اسلام آباد ریکارڈ تیسری بار پی ایس ایل کا چیمپئن بنا۔
چیمپئن ٹیم اسلام آباد یونائیٹڈ کے کپتان شاداب خان نے ایونٹ میں بہترین قائدانہ صلاحیتوں کے ساتھ نہ صرف اپنی ٹیم کو تیسری بار پی ایس ایل کا چیمپئن بنوایا بلکہ آل راؤنڈ کارکردگی دکھاتے ہوئے اس سیزن میں 305 رنز اور 9 وکٹیں حاصل کیں۔ انہیں اسی کارکردگی پر پلیئر آف دی ٹورنامنٹ کا ایوارڈ بھی دیا گیا۔
چیمپئن بننے اور ٹرافی اٹھانے کا جشن منانے کے بعد شاداب خان اسٹیڈیم میں موجود اپنی فیملی کے پاس گئے اور اپنے والدین سے گلے ملے۔
اس موقع پر شاداب خان نے فائنل میں ملنے والا وننگ میڈل اپنی والدہ کو پہنا دیا جب کہ اہلیہ کو پلیئر آف دی ٹورنامنٹ کا ایوارڈ دیا۔
View this post on Instagram
اس موقع پر فرط جذبات سے شاداب خان کے والدین کی آنکھوں میں خوشی کے آنسو بھی چھلک پڑے جس کی ویڈیو سوشل میڈیا پر وائرل ہو گئی۔
دوسری جانب شاداب خان کی والدہ نے اسلام آباد یونائیٹڈ کے بولر نسیم شاہ اور ان کے بھائیوں کو بھی گلے لگایا اور جیت کی مبارکباد دی۔
View this post on Instagram
شاداب خان کا کہنا ہے کہ نسیم شاہ کی والدہ حیات نہیں ہیں اسی لیے وہ میری والدہ کو اپنی ماں کا درجہ دیتے ہیں اور میری والدہ بھی انہیں بیٹوں کی طرح چاہتی ہیں۔
