سورائسز یعنی چنبل جلد کی ایک ایسی بیماری ہے جو جلد کے نئے خلیوں کے بہت تیزی سے پیدا ہونے سے ہوتی ہے، اس کے نتیجے میں جلد کے اوپر نئے خلیے سرخ، گھنے اور کھردری شکل میں جسم کے کسی بھی حصے پر ظاہر ہوتے ہیں۔
اس حوالے سے اے آر وائی نیوز کے پروگرام باخبر سویرا میں ماہر امراض جلد ڈاکٹر آمنہ محمد راج نے بتایا کہ چنبل دائمی مرض ہے، اس بیماری پر قابو پانے میں قوت مدافعت کا اہم کردار ہے۔
اس بیماری کی علامات میں قوت مدافعت کے نظام میں دشواریاں بھی شامل ہیں، اس بیماری کی علامات بعد میں از خود غائب ہوسکتی ہیں یا پھر دوبارہ بھی پیدا ہوسکتی ہیں۔ اس کے علاوہ چنبل کا کوئی باقاعدہ علاج نہیں ہے لیکن بہت ساری دوائیں ایسی ہیں جو علامات پر قابو پانے میں مدد کرسکتی ہیں۔
انہوں نے کہا کہ چنبل بہت عام ہے اور عام طور پر بڑی عمر کے لوگوں میں پایا جاتا ہے، مرد اور خواتین سوریاسس کے لیے یکساں طور پر حساس ہیں، تاہم خطرے والے عوامل کو کم کرکے چنبل کی شدت کے امکانات کو کم کیا جاسکتا ہے۔
