The news is by your side.

Advertisement

دہشت گرد نے مجھے زندہ پاکر رائفل اٹھائی تو میں نے سر پر گولی ماری، بہادر اہلکار

کراچی: پاکستان اسٹاک ایکسچینج پر دہشت گردوں کا 8 منٹ میں صفایا کرنے والے بہادر اہلکار نے آپ بیتی بتادی۔

تفصیلات کے مطابق پاکستان اسٹاک ایکسچینج پر چاروں دہشت گردوں کو مارنے والے  بہادر اہلکار وں کے اعزاز میں کراچی میں تقریب کا انعقاد کیا گیا جس سے گفتگو کرتے ہوئے ریپڈ رسپانس فورس (آر آر ایف )کے بہادر اہلکار رفیق سومرو نے بتایا کہ دہشت گرد ایک ایک کرکے فائرنگ کررہے تھے اور ساتھ ہی دستی بم بھی پھینک رہے تھے۔

بہادر اہلکار رفیق سومرو کے مطابق ہمارے چند ساتھی شہید ہوئے تو دہشت گرد نے مجھے زندہ پاکر مارنے کے لیے رائفل اٹھائی ہی تھی کہ میں نے فوری اس کے سر پر گولی ماری۔

رفیق سومرو نے مزید بتایا کہ چاروں دہشت گرد اسٹاک ایکسچینج کے اندر داخل ہونا چاہتے تھے لیکن ہم نے انہیں آگے بڑھنے نہیں دیا اور مرکزی گیٹ پر ہی مار گرایا۔

مزید پڑھیں : کورکمانڈر کراچی کا اسٹاک ایکسچینج پرحملہ ناکام بنانے والے اہلکاروں کو خراج تحسین

واضح رہے کہ چند روز قبل پاکستان اسٹاک ایکسچینج پر دہشتگردوں نے حملہ کیا تھا جس کے نتیجے میں ایک پولیس اہلکار اور اسٹاک ایکسچینج کے 2 سیکیورٹی گارڈ سمیت 7 افراد شہید ہوگئے جب کہ فورسز کی جوابی کارروائی میں چاروں دہشتگرد مارے گئے تھے۔

پولیس کے مطابق پولیس اور رینجرز اہلکاروں نے اسٹاک ایکسچینج میں داخلے کی کوشش کرتے وقت 2 دہشتگردوں کو ہلاک کیا جب کہ مزید 2 دہشتگردوں کو آگے ہی مار گرایا اور دہشتگرد اسٹاک ایکسچینج کی عمارت میں داخل نہ ہوسکے۔

پولیس ترجمان کا بتانا تھا کہ دہشتگردوں کے حملے میں ایک پولیس سب انسپکٹر اور اسٹاک ایکسچینج کے 2 سیکیورٹی گارڈ بھی شہید ہوگئے، اس کے علاوہ پولیس اہلکار سمیت 7 افراد زخمی بھی ہوئے ہیں۔

Comments

یہ بھی پڑھیں