اسلام آباد: پاکستان ٹیلی کمیونیکیشن اتھارٹی (پی ٹی اے) نے ٹویٹر سے پاکستان مخالف پروپیگنڈا کرنے والے اکاؤنٹس کے خلاف کارروائی کرنے کا مطالبہ کردیا۔
پاکستان ٹیلی کمیونیکیشن اتھارٹی کی جانب سے جاری ہونے والے اعلامیے میں بتایا گیا ہے کہ پی ٹی اے نے ٹویٹر انتظامیہ سے سخت مانیٹرنگ شروع کرنے کا مطالبہ بھی کیا۔
اعلامیے میں بتایا گیا ہے کہ ’پی ٹی اے نے ٹویٹر انتظامیہ کو کہا کہ وہ مواد کی نگرانی کرنے والی ٹیموں کو متحرک کرے اور پاکستان کے خلاف ہونے والے پروپیگنڈے کو روکے‘۔
’ٹوٹیر اس بات کو یقینی بنائے کہ اُس کے پلیٹ فارم پر کوئی بھی شخص پاکستان سے متعلق کسی بھی قسم کا پروپیگنڈا نہ کرے اور جو کرے اُس کے خلاف فوری طور پر سخت ایکشن لیا جائے‘۔
مزید پڑھیں: ’ٹویٹر انتظامیہ تعاون کررہی ہے، انشاء اللہ جلد مزید پیشرفت ہوگی‘
پی ٹی اے نے پاکستان سے متعلق غلط معلومات اور افواہیں پھیلانے والے اکاوَنٹس کےخلاف کارروائی کا مطالبہ کرتے ہوئے کہا کہ ’ٹویٹر اس بات کو یقینی بنائے کہ اُس کا پلیٹ فارم پروپیگنڈا ہتھیار کے طور پر استعمال نہ ہو‘۔
In the wake of current smear campaign of spreading false and baseless information targeting Pakistan, its cities and institutions, PTA has stressed upon Twitter to effectively block handles involved in the campaign. pic.twitter.com/Rnt9sLeCAu
— PTA (@PTAofficialpk) October 22, 2020
پاکستان ٹیلی کمیونیکیشن اتھارٹی نے بتایا کہ ٹویٹر پر ویریفائیڈ اکاؤنٹس سے بھی پاکستان کے خلاف کھل کر پروپیگنڈا کیا جارہا ہے، جو ریگولیٹر کے لیے مایوس کن ہے، انتظامیہ قواعد و ضوابط کے مطابق ایسے تمام اکاؤنٹس کے خلاف سخت کارروائی کرے‘۔
