اسلام آباد : پاکستان ٹیلی کمیونیکیشن لمیٹڈ نے اپنے ملازمین کے لیے ادارے سے رضا کارانہ علیحدگی کی اسکیم کا اعلان کردیا۔
اسکیم کا باضابطہ اعلان پی ٹی سی ایل کے چیف ہیومن ریسورس آفیسر نے اسلام آباد میں میڈیا سے گفتگو کرتے ہوئے کیا۔ انہوں نے بتایا کہ اس قبل 2014 میں بھی ملازمین کی ادارے سے رضاکارانہ اسکیم متعارف کرائی گئی تھی۔
پی ٹی سی ایل حکام کا کہنا تھا کہ اس سال ملازمت سے رضا کارانہ علیحدگی کی اسکیم کو ملازمین کی آراء اور تجاویزات کی روشنی میں مرتب کیا گیا ہے۔
پی ٹی سی ایل کے مطابق یہ اسکیم 28 نومبر 2016 سے موثر ہو گی جب کہ اس اسکیم سے تقریبا 3 ہزار ملازمین فائدہ اٹھا سکیں گے۔
پی ٹی سی کا کہنا ہے کہ موجودہ اسکیم نو ہزار ملازمین کو پیش کی جائے گی اور تین ہزار ملازمین کو مذکورہ اسکیم کے ذریعے فارغ کرنے کا انتظام کیا گیا ہے۔
ان کا کہنا تھا کہ اس اسکیم میں سو تنخواہوں کے ایک پرکشش پیکج کے علاوہ پی ٹی سی ایل ماہرین کے ذریعے بھرتی کی سہولت اور پیشہ وارانہ تربیت کا بھی انتظام کرے گی۔
واضح رہے پاکستان ٹیلی کمیونیکیشن لمیٹڈ کی چند برس قبل نج کاری کردی گئی تھی جس کے بعد اس کا انتظام شعبہ مواصلات سے جڑی ایک بڑی پرائیوٹ کمپنی چلا رہی ہے۔