اسلام آباد: پی ٹی آئی رہنما علی محمد خان اور سینیٹر اعجاز چوہدری کو پولیس نے گرفتار کرلیا۔
اے آر وائی نیوز کے مطابق پولیس حکام کا کہنا ہے کہ پی ٹی آئی رہنما علی محمد خان اور سینیٹر اعجاز چوہدری کو تھری ایم پی او کے تحت گرفتار کیا گیا ہے۔
ذرائع کا بتانا ہے کہ دونوں رہنماؤں کو کچھ دیر بعد اڈیالہ جیل منتقل کیا جائے گا۔
واضح رہے کہ اس سے قبل گرفتار پی ٹی آئی رہنماؤں شاہ محمود قریشی ، اسد عمر اور فواد چوہدری کو اڈیالہ جیل منتقل کیا گیا تھا۔
اسلام آباد کیپٹل پولیس کی جانب سے بیان میں کہا گیا تھا کہ جلاؤ گھیراؤ اور پرتشدد مظاہروں پر اکسانے والوں کے خلاف کارروائیاں ہو رہی ہیں۔
پولیس کا کہنا تھا کہ تمام گرفتاریاں قانونی تقاضوں کو مکمل کر کے عمل میں لائی گئیں ہیں، مزید گرفتاریاں بھی متوقع ہیں، عوام میں افواہ اور اشتعال پھیلانے سے گریز کریں۔
یاد رہے کہ تحریک انصاف کے وائس چیئرمین شاہ محمود قریشی کو اسلام آباد میں گلگت بلتستان ہاؤس سے گرفتار کیا گیا، اس سے پہلے فواد چوہدری کو سپریم کورٹ کے باہر سے اور اسد عمر کو اسلام آباد ہائیکورٹ سے گرفتار کیا گیا تھا۔
