کوئٹہ : تحریک انصاف بلوچستان کے ٹائیگرز لانگ مارچ میں شرکت کیلئے تیار ہیں، قافلہ صوبائی صدرقاسم سوری کی قیادت میں روانہ ہوگا۔
تفصیلات کے مطابق تحریک انصاف بلوچستان کے صدر سابق ڈپٹی اسپیکر قاسم خان سوری نے اپنے بیان میں کہا ہے کہ بلوچستان سے آزادی لانگ مارچ کیلئے قافلے کوئٹہ سے براستہ ژوب اسلام آباد روانہ ہونے کیلئے تیارہیں۔
قاسم خان سوری کا کہنا تھا کہ بلوچستان کے ٹائیگرزاسلام آباد میں لانگ مارچ میں شریک ہوں گے۔
انھوں نے کہا کہ حقیقی آزادی کی جنگ صرف عمران خان یا پاکستان تحریک انصاف کی نہیں بلکہ ہر پاکستانی کی ہے۔
پی ٹی آئی بلوچستان کے صدر کا کہنا تھا کہ پاکستان تحریک انصاف لانگ مارچ کا مقصد حقیقی آزادی اور غلامی سے نجات ہے۔
دوسری جانب تحریک انصاف کوئٹہ کے صدر عالم کاکڑ نے بتایا کہ تحریک انصاف بلوچستان کے ٹائیگرز لانگ مارچ کو اسلام آباد میں جوائن کریں گے۔
عالم کاکڑ کا کہنا تھا کہ بلوچستان سے قافلہ صوبائی صدرقاسم سوری کی قیادت میں روانہ ہوگا، مرکزی لانگ مارچ اسلام آباد میں داخل ہوگا تو بلوچستان کے ٹائیگر ساتھ ہوں گے۔
