لاہور سے قومی اسمبلی کے حلقہ این اے 119 میں پاکستان تحریک انصاف کے حمایت یافتہ امیدوار مسلم لیگ (ن) کے حق میں دستبردار ہوگئے۔
پی ٹی آئی کے حمایت یافتہ امیدوار محمد وسیم کارکنوں سمیت (ن) لیگ میں ہوگئے جبکہ وہ 25 جنوری کو جلسے میں سمولیت کا باضابطہ اعلان کریں گے۔ محمد وسیم نے ساتھیوں سمیت چیف آرگنائزر (ن) لیگ مریم نواز سے ملاقات کی۔
مریم نواز نے محمد وسیم کو مبارکباد دیتے ہوئے کہا کہ آپ نے ترقی کے قافلے میں شمولیت اختیار کر لی، 2018 سے 2022 تک نااہلی کا اثر پورے ملک نے دیکھا اور بھگتا، خواتین رو رہی ہیں کہ گھروں میں گیس نہیں آ رہی۔
انہوں نے کہا کہ سیاسی مخالفین کو رلانے کی خواہش رکھنے والوں کی وجہ سے پورا ملک رو رہا ہے، پوری دنیا نواز شریف کے دور کی ترقی کی مثالیں دیتی ہے، لاہور کی ترقی کی مثالیں دی جاتی تھی وہی لاہور گندگی کا ڈھیر بن گیا۔
مریم نواز نے کہا کہ خدمت کرنا مشکل کام ہوتا ہے، نواز شریف اور شہباز شریف اس امتحان میں سرخرو ہوئے، عوام کو پتا ہے کس نے کام اور کس نے انتقام لیا اور کس نے جھوٹ بولا؟
ان کا کہنا تھا کہ (ن) لیگ پر برا وقت آیا تو کسی لیڈر اور کارکن نے پارٹی نہیں چھوڑی۔
