اسپیکر قومی اسمبلی کے الیکشن کمیشن کو خط کے بعد پارٹی پوزیشن میں تبدیلی ہوگئی ہے اور قومی اسمبلی سے تحریک انصاف کا وجود ختم ہوگیا ہے۔
اے آر وائی نیوز کے مطابق نئے الیکشن ایکٹ ترمیمی بل پر عملدرآمد کے لیے اسپیکر قومی اسمبلی کی جانب سے الیکشن کمیشن کو خط لکھے جانے کے بعد پارٹی پوزیشن تبدیل ہوگئی ہے۔ قومی اسمبلی سیکریٹریٹ نے نئی پارٹی پوزیشن مرتب کر لی ہے اور اس کے تحت قومی اسمبلی سے تحریک انصاف کا وجود ختم ہو گیا ہے۔
اس سے قبل قومی اسمبلی کی پارٹی پوزیشن میں اس سے پہلے 39 اراکین تحریک انصاف اور 41 کو آزاد ڈیکلیئر کیا گیا تھا، تاہم قومی اسمبلی سیکریٹریٹ کی مرتب کردہ نئی پارٹی پوزیشن میں تمام 80 اراکین کو سنی اتحاد کونسل کا رکن ظاہر کیا گیا ہے۔
نئی پارٹی پوزیشن میں مسلم لیگ ن، پی پی پی اور جے یو آئی سے واپس لی گئی نشستوں کا بھی ذکر ہے۔
قومی اسمبلی میں مسلم لیگ ن کی 110، پیپلز پارٹی کی 69 نشستیں ہیں۔ ایم کیو ایم پاکستان کی 22، مسلم لیگ ق کی 5 جب کہ آئی پی پی کی چار نشستیں ہیں۔
اس کے علاوہ مسلم لیگ ضیا، بی اے پی اور نیشنل پارٹی کا بھی ایک، ایک رکن ہے۔
سنی اتحاد کونسل 80، جے یو آئی ف اور آزاد اراکین کی تعداد بھی 8 ہے۔ پی کے میپ، بی این پی مینگل اور ایم ڈبلیو ایم ایک، ایک نشست کے ساتھ قومی اسمبلی میں موجود ہیں جب کہ ایک آزاد رکن قومی اسمبلی نے مسلم لیگ ن میں شمولیت اختیار کر رکھی ہے۔
الیکشن ایکٹ پرعملدرآمد سے 23 مخصوص نشستیں ن لیگ، پی پی اور جے یو آئی کو ملیں گی۔ نشستوں کی تقسیم کے مطابق مسلم لیگ ن 15، پیپلز پارٹی 5 اور جے یو آئی کو تین مخصوص نشستیں حاصل ہو سکیں گی۔
