اسلام آباد: پاکستان تحریک انصاف آج اسلام آباد کےپریڈ گراؤنڈ میں یوم تشکر منارہی ہے جس کے لیے پی ٹی آئی کےکارکنوں کی جانب سےتیاریاں جاری ہیں۔
تفصیلات کےمطابق اسلام آباد لاک ڈاؤن کی کال واپس لینے کے بعد تحریک انصاف آج یوم تشکر منا رہی ہے۔اسلام آباد کے پریڈگراؤنڈ میں جلسے کی تیاریا ں جاری ہیں۔
اسلام آباد پریڈ گراؤنڈ میں دس ہزار کرسیاں لگ گئیں ہیں اور تحریک انصاف کی قیادت کے لیے اسی فٹ لمبا اور دس فٹ اونچا اسٹیج بنایا جارہاہے۔
مزید پڑھیں:چند روز میں پتا چل جائے گا ہماری کتنی بڑی جیت ہوئی، عمران خان
خیال رہے کہ تحریک انصاف کے کارکنوں کی جانب سے کی جانے والی تیاریوں کا پاکستان تحریک انصاف کے سربراہ عمران خان نے پریڈ گراؤنڈ کادورہ کرکے جائزہ لیا اور کارکنوں کی تیاریوں کی تعریف کی۔
پاکستان تحریک انصاف کی جانب سے آج منعقد ہونے والے جلسے کے لیے اسلام آباد کی انتظامیہ نے ٹریفک پلان جاری کر دیا ہے۔اسلام آباد لاک ڈاؤن کی کال کے باعث پنجاب میں بند کی جانے والی تمام سڑکیں کھول دی گئی ہیں۔
مزید پڑھیں: تحریک انصاف کل یوم تشکر منائے گی
یاد رہے کہ اس سے قبل گزشتہ روز پاناما لیکس پر سپریم کورٹ کی کارروائی کے بعد عمران خان نے دھرنے کی کال واپس لے کر جلسے کا اعلان کیا تھا۔
واضح رہے کہ گزشتہ روز عمران خان نےبنی گالہ میں کارکنان سے خطاب کرتے ہوئے کہاتھا کہ میں پورے پاکستان کی جانب سے سپریم کورٹ کو خراجِ تحسین پیش کرتا ہوں جس نے جمعرات سے وزیراعظم نواز شریف کی تلاشی شروع کرنے کا اعلان کیا ہے۔
