کراچی : تحریک انصاف نے این اے 237 کے ضمنی الیکشن میں پی پی امیدوار عبدالحکیم بلوچ کی کامیابی کو چیلنج کردیا۔
تفصیلات کے مطابق تحریک انصاف نے ضمنی الیکشن میں پی پی امیدوارحکیم بلوچ کی کامیابی کیخلاف سندھ ہائیکورٹ میں درخواست دائرکردی۔
علی زیدی نے پی ٹی آئی کی طرف سے درخواست دائر کی گئی ، جس میں الیکشن کمیشن، سندھ حکومت اور حکیم بلوچ کو فریق بنایا گیا ہے۔
درخواست ڈاکٹر شہاب امام ایڈووکیٹ کے توسط سے دائر کی، جس میں مؤقف اپنایا گیا ہے کہ این اے 237 میں بدترین دھاندلی کی گئی، حلقے میں پیپلز پارٹی کارکنان نے جعلی ووٹ ڈالے۔
پی ٹی آئی کا کہنا ہے کہ حلقےمیں دھاندلی سےمتعلق الیکشن کمیشن کوشکایات بھی کیں، دھاندلی و دیگر شکایات پر شفاف تحقیقات کا حکم دیا جائے۔
یاد رہے این اے237 میں زبردستی ووٹ ڈالنے اور ڈی وی آر چوری کا انکشاف سامنے آیا تھا، پولنگ اسٹیشن 108 کے پریذائیڈنگ افسرمظہرعلی نے بھانڈا پھوڑاتھا۔
جس کے بعد پرنسپل گورنمنٹ بوائزسندھی اسکول آسوویلیج کی جانب سے مقدمہ درج کرایا گیا تھا۔
مقدمے میں کہا گیا کہ دوپہر2بجےتک نارمل اندازمیں پولنگ کاعمل جاری تھا کہ ڈھائی بجے کے قریب 8 سے 10 افراد ووٹ دینےکی نیت سےآئے، بوتھ نمبر 2 پر اندر گئے، اے پی او سے بیلٹ پیپر لے کر مہر لگا رہے تھے۔
مقدمے کے متن میں کہا کہ 20 سے 25 پیپر مہر لگائے ہوئے بیلٹ بکس میں ڈال دیئے گئے تھے، عملے نے شور مچانا شروع کیا زبردستی ووٹ ڈالنے والے بھاگ نکلے۔
پرنسپل اسکول کا کہنا تھا کہ جیسے ہی کمرے میں پہنچاتو دیکھا ایک شخص بیلٹ پیپرپرمہرلگارہاتھا، سی سی ٹی وی موجود تھی میں نے آر او کو اطلاع دی ہوئی تھی۔
5 بجے کے بعد فارم 45/46 پورا کرنے کیلئے اسٹاف کے ہمراہ ایچ ایم دفترمیں تھا، اچانک 8 سے 10افراد پھر آئے، ہنگامہ کیا اور ڈی وی آر لے کر چلےگئے، ڈی وی آر میں صبح سے شام تک کی ریکارڈنگ موجود تھی۔
