اسلام آباد : توہین الیکشن کمیشن کیس میں الیکشن کمیشن نے بانی پی ٹی آئی کا ٹرائل جیل میں کرنے کا فیصلہ کرلیا، کیس کی سماعت 13 دسمبر کو اڈیالہ جیل میں ہوگی۔
تفصیلات کے مطابق توہین الیکشن کمیشن و چیف الیکشن کمشنر کیس کا محفوظ فیصلہ سنا دیا گیا، جس میں کہا گیا ہے کہ بانی پی ٹی آئی اور فواد چوہدری کا ٹرائل جیل میں ہو گا۔
الیکشن کمیشن نے فیصلے میں کہا کہ کیس کی سماعت 13 دسمبر کو اڈیالہ جیل میں ہو گی اور فرد جرم کی کاروائی اڈیالہ جیل میں عائد کی جائے گی۔
الیکشن کمیشن نے محفوظ فیصلہ سناتے ہوئے وزارت داخلہ کو تمام انتظامات مکمل کرتے ہوئے دو دن میں رپورٹ کرنے کا حکم بھی دیا۔
دوسری جانب توہین الیکشن کمیشن و چیف الیکشن کمشنر کیس کا تحریری فیصلہ جاری کردیا گیا ہے، جس میں کہا ہے کہ بانی پی ٹی آئی کیخلاف توہین الیکشن کمیشن کی کارروائی اڈیالہ جیل میں ہوگی، وزارت داخلہ کو جیل میں کارروائی سے متعلق نوٹیفکیشن جاری کرنےکاحکم دے دیا ہے اور 2دن میں ضروری انتظامات مکمل کرکے رپورٹ دینے کی ہدایت کی ہے۔
5صفحات پر مشتمل فیصلہ بانی پی ٹی آئی اور 2صفحات پر مشتمل فیصلہ فواد چوہدری سے متعلق ہے، جس میں کہا ہے کہ وزارت داخلہ نے سیکیورٹی وجوہات پر پیش کرنے سے معذرت کی، وزارت داخلہ نے دیگرمقدمات کی طرح اڈیالہ جیل میں ٹرائل کرنےکی تجویز دی، اور زارت قانون نے بھی اڈیالہ جیل میں کیس کا ٹرائل کرنے کی رائے دی۔
تحریری فیصلے میں کہا گیا کہ بانی پی ٹی آئی کیخلاف توہین الیکشن کمیشن کیس 2022سےزیرسماعت ہے، متعدد بار بانی پی ٹی آئی کو طلب کیا وارنٹ جاری کئےمگر وہ پیش نہ ہوئے، بانی پی ٹی آئی کے وکلا کی جانب سے بار بار التواکی درخواستیں دائر ہوئی۔
فیصلے میں کہنا تھا کہ توہین الیکشن کمیشن و چیف الیکشن کمشنر کیس کو مزید تاخیر کا شکار نہیں بنایا جاسکتا، وزارت داخلہ ووزارت قانون کی رائے ہے، اڈیالہ جیل میں سماعت کی جائے گی۔
الیکشن کمیشن نے کہا ہے کہ بانی پی ٹی آئی کے پروڈکشن آرڈرز کی تعمیل ممکن نہیں ہے اور الیکشن کمیشن کے پاس اڈیالہ جیل کے سواسماعت کیلئے کوئی اور طریقہ موجود نہیں، 13دسمبر کو 4رکنی بینچ اڈیالہ جیل میں اس کیس کی سماعت کرے گا۔
یاد رہے وزارت داخلہ نے بانی چیئرمین کو الیکشن کمیشن پیش کرنے سے معذرت کی تھی اور وزارت داخلہ نے وزارت قانون سے رائے لیکر بانی چیئرمین تحریک انصاف اور فواد چوہدری کا اڈیالہ جیل میں ٹرائل کی درخواست کی تھی۔
بعد ازاں الیکشن کمیشن نے وزارت قانون کی رائے موصول ہونے پر فیصلہ محفوظ کیا تھا۔
