اسلام آباد : تحریک انصاف نے پارلیمنٹ کے مشترکہ اجلاس سے بائیکاٹ کا فیصلہ کرلیا، مشترکہ اجلاس آج شام 4 بجے ہوگا۔
تفصیلات کے مطابق پاکستان تحریک انصاف ( پی ٹی آئی ) نے پارلیمنٹ کے مشترکہ اجلاس سے بائیکاٹ کرنے کا فیصلہ کرلیا اور کہا پی ٹی آئی کا کوئی سینیٹر مشترکہ اجلاس میں شریک نہیں ہوگا۔
خیال رہے اسپیکر قومی اسمبلی راجہ پرویز اشرف کی زیر صدارت پارلیمنٹ کا مشترکہ اجلاس آج ہوگا۔
مشترکہ اجلاس کا دو نکاتی ایجنڈا جاری کردیا گیا ہے ، آج پارلیمنٹ کے مشترکہ اجلاس میں ملک میں دہشت گردی کے باعث امن وامان کی ابتر صورتحال اور پارلیمنٹ میں قومی اداروں کے احترام کے معاملے پر بحث ہوگی۔
اجلاس میں قومی اداروں کے احترام کے علاوہ خارجہ پالیسی ،معاشی صورتحال اور موسمیاتی تبدیلی پر بھی بحث کی جائے گی۔
اجلاس میں افواج پاکستان اور اس کی قیادت کے خلاف سوشل میڈیا پر ہرزہ سرائی کے خلاف مذمتی قرارداد منظور کرائی جائے گی۔
