پاکستان تحریک انصاف کے رہنما اور سابق وزیر خارجہ شاہ محمود قریشی نے وزیر اعظم ہاؤس سے ڈپلومیٹک سائفر غائب ہونے کی تحقیقات کا مطالبہ کر دیا۔
اے آر وائی نیوز سے گفتگو میں شاہ محمود قریشی نے کہا کہ حکومت نے تسلیم کرلیا کہ سائفر ایک حقیقت ہے، وزیراعظم ہاؤس سے دستاویز کا غائب اور باتیں ریکارڈ ہو جانا سکیورٹی لیپس ہیں، اس کی تحقیقات ہونی چاہیے، یہ ایک گھبرائی ہوئی حکومت کی کارستانیاں ہیں۔
شاہ محمود قریشی نے کہا: ’آڈیو لیکس حکومت کا اپنا ایجنڈا ہے۔ حکومت اپنی آڈیو لیکس سے توجہ ہٹانا چاہتی ہے۔ وزیراعظم ہاؤس کے غیر محفوظ ہونے سے توجہ ہٹانے کے لیے شوشہ چھوڑ جا رہا ہے۔ پریشان ہوں کہ وزیراعظم ہاؤس سے دستاویز کیسےغائب ہوگیا‘۔
سابق وزیر خارجہ نے کہا کہ آڈیو لیکس سے متعلق عمران خان بالکل پریشان نہیں، ہمیں پاکستان سے پیار ہے اور پریشانی کا سوال ہی پیدا نہیں ہوتا، پاکستان کے معاملات میں بات آئے تو دفاع کرنا ہمارا فرض ہے۔
پی ٹی آئی رہنما نے کہا کہ حکومت آڈیو لیکس کیوں کرا رہی ہے، کیا حاصل ہوگا ان سے ہی پوچھیں، حکومت کا اپنا ایجنڈا ہے، ہمارا مؤقف بالکل واضح ہے۔
