سینیٹر عرفان صدیقی نے کہا ہے کہ بانی پی ٹی آئی اب بوکھلاہٹ کی آخری حد تک پہنچ چکےہیں، ان کی باتیں بوکھلاہٹ کی عکاس ہیں۔
اے آر وائی نیوز کے پروگرام خبر میں گفتگو کرتے ہوئے مسلم لیگ ن کے سینیٹر عرفان صدیقی نے کہا کہ بانی پی ٹی آئی جو باتیں کررہے ہیں وہ بوکھلاہٹ کی عکاس ہیں، بانی پی ٹی آئی جو بھی سمجھیں لیکن زمینی حقائق ان کا ساتھ نہیں دے رہے۔
انھوں نے کہا کہ اصولی طور پر جب 2 طاقتیں آمنے سامنے ہوں تو مذاکرات ہوتے ہیں، بانی پی ٹی آئی سمجھتے ہیں کہ ان کے پاس بہت بڑی طاقت ہے، بانی پی ٹی آئی سمجھتےہیں طاقت کے زور پربڑی طاقت سے ٹکر لےسکتے ہیں۔
سینیٹر عرفان صدیقی نے کہا کہ بانی پی ٹی آئی سمجھتے ہیں اپنی طاقت سے 70سالہ تاریخ کو ملیا میٹ کرسکتے ہیں۔
انھوں نے کہا کہ آصف زرداری نے کہا تھا اصل جیل سوا سال بعد شروع ہوتی ہے، بانی پی ٹی آئی کی پارٹی اور اپنی قوت برف کی طرح تحلیل ہوچکی ہے، بانی پی ٹی آئی کو عوامی قوت پر ناز تھا اب وہ نہیں رہی۔
بانی پی ٹی آئی راستے بند ہوتے دیکھتے ہیں تو نیا بیانیہ بنانے کی کوشش کرتے ہیں، بانی پی ٹی آئی بیانیہ بنارہے ہیں کہ جیل کے اندر سے انقلاب برپا کریں گے۔
رہنما مسلم لیگ ن نے کہا کہ بانی پی ٹی آئی جیل سے باہر اور طاقتور تھے تب کوئی تہلکہ مچا نہیں سکے، بانی پی ٹی آئی کی حالیہ باتوں میں کوئی جان، نظریہ یا ویژن نہیں ہے، پی ٹی آئی کی لیڈر شپ اب سائڈ لائن ہوچکی ہے، کوئی سامنے نہیں۔
عرفان صدیقی نے کہا کہ بانی پی ٹی آئی کہتے ہیں تحریک چلائیں گے تو ٹھیک ہے زور آزمائیں، بانی پی ٹی آئی تحریک چلاکر اپنے لیے مشکلات میں اضافہ چاہتے ہیں تو چلالیں۔
وزیراعظم شہبازشریف نے بھی یہی کہا کہ دروازے کھلے ہیں، وزیراعظم شہباز شریف نے کہا کہ بات چیت کےلیے تیار ہیں، مذاکراتی کمیٹی بنائی گئی، میں خود اس کا حصہ تھا۔
سینیٹرعرفان صدیقی نے کہا کہ پی ٹی آئی جمہوری رویوں، مذاکرات کےلیے نہیں بنی، پی ٹی آئی صرف سازشوں کےلیے بنی ہے، یہی ان کی تاریخ ہے۔
انھوں نے کہا کہ اسٹیبشلمنٹ کا کوئی شخص بانی سے بات کرلے تو کوئی انقلاب نہیں رہےگا، بانی پی ٹی آئی کسی دروازے، کھڑکی کھلنے کے انتظار میں ہیں، پی ٹی آئی سنجیدگی دکھائے تو پھر مذاکرات ہوسکتے ہیں۔
