اسلام آباد : سینیٹر شبلی فراز کا کہنا ہے کہ بانی پی ٹی آئی عمران خان ہر قسم کے مذاکرات کیلئے تیار ہیں ، ملک موجودہ صورتحال کا مزید متحمل نہیں ہوسکتا۔
تفصیلات کے مطابق مذاکرات کیلئے پی ٹی آئی کا حکمت عملی سےمتعلق مشاورتی اجلاس رواں ہفتے ہوگا۔
رہنما شبلی فراز نے اسی ہفتے اعلیٰ سطح مشاورتی اجلاس کے انعقاد کی تصدیق کرتے ہوئے کہا ملک کےمستقبل کیلئے بانی پی ٹی آئی کے دروازے بات چیت کیلئے کھلے ہیں، عمران خان ہرقسم کےمذاکرات کیلئے تیار ہیں۔
ان کا کہنا تھا کہ آئندہ مذاکرات سےمتعلق امورعوامی سطح پر ڈسکس نہیں کریں گے، سنجیدہ معاملہ ہے اس کیلئے خاص سنجیدگی اور طرز عمل چاہیے۔
پی ٹی آئی سینیٹر نے بتایا کہ اجلاس میں اس معاملے کو سنجیدگی سے زیر بحث لائیں گے اور مشاورت سے مذاکرات کیلئے کوئی راستہ نکالیں گے، جب تک راستہ نہیں نکلے گا ملک کی مشکلات ختم نہیں ہوں گی۔
شبلی فراز کا کہنا تھا کہ کوشش ہے ایسا راستہ اپنایا جائے ، جس سے سیاسی عدم استحکام ختم ہو، مذاکرات سے متعلق پی ٹی آئی کی حکمت عملی میں کافی سنجیدگی آرہی ہے، اب ہم نے مذاکرات سے ملک کیلئے کوئی راستہ نکالنا ہے۔
انھوں نے کہا کہ آئین و قانون کی حکمرانی کے اصول کے اندر رہتے ہوئے حکمت عملی طےکرنی ہے ، ملک موجودہ صورتحال کامزید متحمل نہیں ہوسکتا۔
