لاہور : چیئرمین تحریک انصاف عمران خان آج پنجاب کے ارکان اسمبلی سے اسمبلیوں کی تحلیل کے معاملے پر رائے لیں گے۔
تفصیلات کےمطابق چیئرمین تحریک انصاف عمران خان نے اسمبلیوں کی تحلیل کے فیصلے کے لیے پی ٹی آئی پنجاب کی پارلیمانی پارٹی کا اجلاس طلب کرلیا۔
پارلیمانی پارٹی کا اجلاس آج ڈھائی بجے 90شاہراہ قائد اعظم ایوان وزیراعلیٰ میں ہوگا ، عمران خان پارلیمانی پارٹی کے اجلاس کی صدارت کریں گے۔
ذرائع نے بتایا کہ ارکان اسمبلی سے اسمبلیوں کی تحلیل کے معاملےپر رائے لی جائے گی اور عمران خان پارلیمانی پارٹی کے اجلاس سے خطاب کریں گے۔
عمران خان پارٹی کو آئندہ کےلائحہ عمل سےمتعلق اعتمادمیں لیں گے، جس کے بعد اسمبلیوں کی تحلیل یا استعفوں سے متعلق عمران خان کا اگلے ہفتے اہم اعلان متوقع ہے۔
یاد رہے گذشتہ روز چیئرمین پی ٹی آئی عمران خان سےوزیراعلیٰ پنجاب پرویزالہٰی نے زمان پارک میں ملاقات کی تھی، ملاقات میں سابق وفاقی وزیر مونس الٰہی اور ایم این اے حسین الٰہی بھی موجود تھے۔
ملاقات میںوزیراعلیٰ پنجاب پرویز الہیٰ نے کہا تھا کہ عمران خان کے کہنے پر پنجاب اسمبلی تحلیل کرنے میں تاخیر نہیں ہوگی، پنجاب اسمبلی عمران خان کی امانت ہے اور یہ انہیں دے دی،ہم عمران خان کے ہر فیصلے کا ساتھ دیں گے،ہم جس کے ساتھ چلتے ہیں، اس کا پورا ساتھ دیتے ہیں۔
