راولپنڈی: پاکستان تحریک انصاف (پی ٹی آئی) نے اڈیالہ جیل میں قید عمران خان سے پارٹی رہنماؤں اور فیملی کی ملاقات کیلیے فہرستیں جیل حکام کو بھیج دیں۔
اڈیالہ جیل میں آج عمران خان سے پارٹی رہنماؤں اور فیملی کی ملاقات کا دن ہے جس کیلیے سیکریٹری جنرل پی ٹی آئی سلمان اکرم راجہ نے ناموں کی فہرستیں جیل حکام کو بھیجی ہیں۔
فہرستوں میں عمر ایوب، شبلی فراز، احمد خان بھچر، صاحبزادہ حامد رضا، راجہ ناصر عباس، نیاز اللہ نیازی، عمران خان کی بہنوں اور کزن کے نام شامل ہیں۔
عمران خان کے ترجمان نیاز اللہ نیازی نے اپنے بیان میں کہا کہ منگل کو بانی پی ٹی آئی کی فیملی کی ملاقات نہیں کروائی گئی، جیل حکام سے آج رہنماؤں کے ساتھ فیملی کی ملاقات کی درخواست کی ہے۔
پی ٹی آئی نے سابق وزیر اعظم سے اڈیالہ جیل میں ملاقات نہ کروانے کے خلاف اسلام آباد ہائیکورٹ سے رجوع کیا گیا جس پر عدالت عالیہ نے عمران خان اور ان کی اہلیہ بشریٰ بی بی سے پارٹی رہنماؤں اور فیملی کی ملاقات کیلیے منگل اور جمعرات کا دن مقرر کیا ہے۔
دو روز قبل بانی پی ٹی آئی کی بہنیں اڈیالہ جیل میں ملاقات کیلیے جانے پر بضد نظر آئیں اور انہوں نے 11 کارکنان سمیت اپنی گرفتاری دی تھی جبکہ ایس ایچ او صدر بیرونی اعزاز عظیم نے ان کو گھر جانے کی پیشکش کی تھی تاہم علیمہ خانم بضد رہیں اور کہتی رہیں کہ ہماری بھائی سے ملاقات کروائی جائے نہیں تو ادھر ہی رہیں گے۔
وزیر اطلاعات و نشریات پنجاب عظمیٰ بخاری کا کہنا تھا کہ پنجاب پولیس نے عمران خان کی بہنوں سمیت کسی خاتون کو گرفتار نہیں کیا، علیمہ خانم و دیگر نے پولیس گاڑی سے ’آن لائن کار سروس‘ حاصل کی، وہ اور ہمنوا خود ہی پولیس وین میں بیٹھیں اور خواجہ سروس اسٹیشن پر اتر گئیں۔
