اسلام آباد: تحریک انصاف کے 30 اکتوبر کے اسلام آباد مارچ کی تاریخ تبدیل ہونے کا امکان ہے، رہنماؤں کے مشورے پر عمران خان نے تاریخ تبدیل کرنے پر غور شروع کردیا۔
اطلاعات کے مطابق ساتھیوں نے عمران خان کو مشورہ دیا ہے کہ 30 اکتوبر کو اتوار ہے اور اتوار کو ویسے ہی اسلام آباد بند ہوتا ہے اس لیے اس دن احتجاج کرنا ٹھیک نہیں اس سے ملحقہ کوئی تاریخ طے کی جائے۔
ذرائع کا کہنا ہے کہ عمران خان احتجاج کی تاریخ تبدیل کرنے پر رضا مند ہوگئے ہیں اور نئی تاریخ پر غور شروع کردیا ہے تاہم حتمی مشاورت 16 اکتوبر کے کور گروپ کے اجلاس میں ہوگی بعدازاں عمران خان نئی تاریخ کا اعلان کردیں گے۔
عوام پی ٹی آئی کے شانہ بشانہ اسلام آباد پہنچیں گے، عمران خان
قبل ازیں اجلاس میں پاکستان تحریک انصاف کے چیئرمین عمران خان کا کہنا تھا کہ 30 اکتوبر کو وفاقی دار الحکومت میں تاریخی احتجاج ہوگا جس میں ملک بھر کے عوام بڑی تعداد میں شرکت کریں گے،حکمران چاہتے ہیں کہ پاناما لیکس کے اسکینڈل کو دفن کردیا جائے تاہم تحریک انصاف پاناما اسکینڈل کو قوم کی نظروں سے اوجھل نہیں ہونے دے گی۔
